一踏入三月，政界就好忙，因為唔少身兼人大政協嘅「愛國立法會議員」要上京開兩會，今年政協同人大分別係三號同五號舉行，十號唐唐講財政預算案，愛唔愛國嘅議員都有排唔得閒。
最近應承咗出任「香港電視專業人員協會」嘅榮譽贊助人嘅立法會主席范徐麗泰話佢會遲啲先至上，唔知係咪要等埋下個星期三唐唐首份預算案；不過，有小道消息就話其實范太喺春節期間已經上過北京，有人喺北京撞過佢，重話范太同曾慶紅密斟過，傾乜唔知。
咁勁料，八方於是早前經范太身邊嘅人問佢，佢斬釘截鐵話冇呢回事，上周五八方又親自問佢，范太話，由於舊年年尾搞年宵攤檔，年初一佢攰到唔郁得，瞓足一日冇出街，春節期間亦冇外遊，再者北京領導放春節假全部收工，邊個得閒見你，煲呔都要等候北京指示啦。
傳真︰2623-9278
電郵︰