最近北京搞唔掂香港人爭取民主訴求，被迫搬番去咗見馬克思嘅鄧伯伯幾十年前嘅講話出嚟，真係戥佢唔得閒，八方最近聽到一個同鄧伯伯有關嘅笑話。
話說鄧伯伯眼見自己偉大發明「一國兩制」嘅香港，俾阿董玩死，於是回魂諗住親手搞掂隻鑊，召見香江一眾政黨頭頭，每人畀一個願望佢哋，叫佢哋咪搞搞震。自己友民建聯主席馬力同自由黨主席田北俊，一個要權一個要錢，容易搞掂，點知民主黨前主席李柱銘錢同權都唔要，淨係話要一人一票民主普選。鄧伯伯呆一呆，好嬲咁話：「民主、普選？這是甚麼？我都沒有，怎麼給你！」
笑話聽完就算，不過鄧伯伯話冇民主，此話看來不假。話說一直緊跟中央嘅民建聯，黨綱上寫住爭取○七○八普選，前主席曾鈺成又講過應召開「圓桌會議」傾政改。由學者組成嘅民主動力都夠晒天真，聽到咁講，儍更更走去邀請民建聯主席馬力討論普選。點知馬力嘅秘書回覆民主動力召集人鄭宇碩，話身兼人大嘅馬力三月要上京開人大會議，唔得閒。鄭宇碩重唔醒水，話咁約馬主席開完人大返港之後傾啦，秘書跟手話，馬主席返港後仍然好忙，抽唔到時間。
其實民主動力成員主要係學者，民建聯連佢哋地唔睬，中央對普選嘅態度可見一斑。
傳真︰2623-9278
電郵︰