今年啲新春晚會季節特別長，打開《大公》、《文匯》，日日都有好多社團團拜、慰問晚宴，《大公》、《文匯》亦詳列好多嘉賓名字、銜頭，內裏有唔少各省市嘅統戰部官員，可說係「空群而出」，佢哋嚟香港慰問鄉親之旅，又飲又食，實在過癮。
呢日碰到C先生，佢有份參加曾人大高歌《沒有共產黨就沒有新中國》之夜，問佢曾人大嘅歌聲有冇曾路德咁好聽，佢諗咗一陣話：「同曾鈺成咁上下啦。」答咗等於冇答，因為我哋冇聽過曾議員唱歌。L先生當晚收卡片收咗一大堆，睇卡片都唔記得邊個打邊個，是但抽一張出嚟睇吓，乃係來自河源市嘅統戰部官員。C先生問：「究竟河源市喺邊一度？統戰部官員落嚟做乜東東？」問得好，左丁山孤陋寡聞，要翻查資料先至可以講到畀佢聽：「河源市位於廣東省東部，惠州市東北面再上，新豐江水庫附近。」
手頭上有本參考書嘅話，查資料就會好快。前些時本欄答覆讀者。話《中華成語辭典》呢本四十年前舊書，中環齡記有售。但據讀者MLL（自稱年青數學教師）來電郵話，佢睇完本欄之後，第二朝早上即去齡記，書店一開門，立即有人衝入去買呢本書，佢夠運買到一本，但次日佢打電話去齡記再問，書已售罄，故此大家唔使再去搵書咯。香港果然有唔少人對有價值嘅參考書有興趣，MLL話一百蚊買書好超值，內容十分精采，好多謝左丁山介紹。本欄宗旨之一，就係碰到好嘢，唔會秘而不宣，能夠幫到《蘋果》讀者進步嘅，一定寫出嚟！