平治
將於下周初舉行嘅瑞士日內瓦車展，會展出多款新車，勢必令車迷有目不暇給之感；但這邊廂嘅香港車迷就更有眼福，事關響前晚（2月27日），一部造型獨特、並改用鷗翼式車門配搭嘅FABDESIGNSL55AMG開篷跑車，專程搭飛機從歐洲抵港，並參加由某大汽車平衡進口商所舉行嘅車展。
記者：鄭達基 攝影：林栢鈞
呢部喺完成某大汽車平衡進口商車展嘅展覽後，隨即會運往瑞士，參加日內瓦車展嘅FABDESIGNSL55AMG，無論係造型、車廂配備，以至係性能表現等各方面，都要比原來平治SL55AMG跑車來得突出；難怪拍攝期間，無論係途人、又或者係坐於其他車輛上嘅乘客，都對其行注目禮啦！
■開關篷頂只需輕按設於車內嘅控制鍵，便可於短時間內完成整個過程，全不假於人手。
原有平治SL55AMG嘅造型，經已散發出一種叫人難以招架嘅跑車韻味；但大家眼前呢部經由FABDESIGN精心改裝嘅新車，就更見有一份吸引力；事關佢唔單止換裝上獨特嘅一體式頭尾泵把連整流器，以及全新鬼面罩，另外重有尺碼達20吋嘅跑車合金胎軨，連285/30ZR20高性能輪胎、設計獨到吸引嘅跑車排氣喉，同埋能有助於高速行車時，有助增強行車隱定性嘅尾定翼㗎！
不過全車最特別嘅地方，相信非一對改用鷗翼式設計嘅車門莫屬，你只需如一般汽車咁，輕輕拉動把手，車門便會除除向上升，加上低重心設計，除方便乘客進出車廂外，亦能令造型變得更富自家一份獨特個性。
當一對鷗翼式車門除除上升之際，相信大家嘅目光，都會被佢嗰個極具跑味嘅車廂鋪排，深深咁吸引住；當中一對以高級真皮鑲嵌嘅桶形跑車座椅，配合上設計獨特、兼有FABDESIGN廠徽嘅頭枕，以及全方位電控調校，乘坐可謂妥貼又舒適㗎！
與此同時，中控台上備有高級音響及原廠恒溫冷氣，設備可謂一應俱全，操作亦見方便容易；備有多項設備遙控鍵嘅軚盤，把持感恰到好處，加埋一套金屬跑車腳踏，一份高性能開篷跑車才有嘅獨特個性，從中徹底地展示出來。
雖然新車外觀上有唔少改動，但仍沿用一台輸出強勁嘅5.5公升V8機械增壓引擎作骨幹，匹配一套5前速半自動波箱，凌厲嘅起步加速反應，實在叫人一試難忘。然而，由於換裝上四輪20吋高性能輪胎組合，喺多套電子系統輔助下，行車循迹性明顯比原有型號來得更出色，當然唔少得重有四輪高效能碟煞，所為你帶來既安全、又可靠嘅感覺啦！
引擎：5439ccV8SOHC機械增壓
馬力：500ps/6100rpm
扭力：71.4kgm/2650-4500rpm
傳動：5前速半自動波，後輪驅動
懸掛：（前）四連桿（後）多連桿
制動：（前）透氣碟（後）透氣碟（ABS）
輪胎：285/30ZR20
新車售價：約港幣250萬
查詢：冠華汽車（28387733）
據冠華汽車董事總經理HenryLeung表示，今次抵港展出嘅FABDESIGNSL55AMG開篷跑車，今日會響尖沙嘴海運大廈展出，而隨後會運往瑞士參加日內瓦車展。如果大家想一睹呢部車嘅真身，就唔好錯過今日嘅最後機會喇！
