上星期四臨收市時，唔知各位有冇留意到好多隻國企鋼鐵股都突然升咗4至5個巴仙，呢一浸升上嚟好似係毫無先兆咁，就好似隻重慶鋼鐵（1053）咁，朝早重係跌緊，點知晏晝一開市，啲買盤就驚死買唔切咁入市。伏勝打電話落市場問有份掃貨嘅行家，問有乜料可以令到隻股咁厲害，佢就靜雞雞咁話，國內去年對鋼材嘅需求好大，而且啲國企鋼鐵股又就快公布業績，所以班芬佬開始收集，希望喺第一隻鋼鐵股公布業績嘅時候，即刻炒高所有鋼鐵股。
隻重鋼聽講係佢哋主要炒作嘅股份，原因係隻股以舊年所承接嘅定單計，舊年每股盈利都可以達到4毫幾子人民幣，再加埋其他散項盈利，分分鐘可以去到1毫子人民幣一股，即係話隻股嘅盈利會由舊年嘅2毫7人民幣升到去5毫幾人民幣一股，到時PE即刻會跌到10倍都唔夠，對比𠵱家成18倍PE，班芬佬點會有唔買嘅理由，所以大家不妨諗諗佢。
上星期有個分析員朋友同另外一班分析員聚餐，講開上個禮拜邊隻股票最勁，大家不約而同話隻金輝集團（137）走勢好勁，原因係隻股由一月底嘅8.2元升到去上星期最高40蚊。朋友問點解隻股可以咁癲，有人就話佢哋前幾年嘅業績雖然唔係好正，但係因為舊年船隊嘅運費加價後，舊年同今年個業績就會靚爆鏡。有人幫佢哋計過盤數，話今年如果用新收費嚟計，每股盈利可以去到8蚊喎，重話隻股票喺30蚊呢個水平仍然算係平，因為PE只係得4倍零，最厲害嘅係有間行話睇64元。不過隻股都升咗咁多，買唔買真係諗過先好。
伏勝