一班自稱是接近阿媽消息人士說：「你要睇實際情況，循序漸進咁布置你間房。」「你布置到你自己間房鬼咁靚，咁咪顯得間屋好肉酸，咁咪就係唔理實際情況囉！」孩子大受委屈：「係我同阿媽一早講好咗，話我自己設計好晒之後，拿個設計畀佢睇睇，如果冇問題就布置得！」「你要知呢間屋係你阿媽嘅，你要愛你這個家，所以你阿媽參與設計係天經地義嘅事。」「我夠知間屋係我阿媽㗎啦，我又冇話要設計間屋，我只不過係設計自己間房之嘛。我點布置間房都好，有常識嘅都知呢間房係喺間屋入面。」「不對！不對！你找外面嘅設計師幫手設計就代表你唔愛呢個家！而且點知你遲啲會唔會帶埋其他阿媽入來住啊？」
其中一個講嘢大大聲的阿伯，整整自己將近發毛的古老領呔：「細路，唱一人有一個夢想個個都比我收服咗啦！唔好再唱一人有一夢想啦。」音樂突然響起，阿伯居然大唱：「一人有一個阿媽，老人是對別迷惘，一齊做乖乖仔這個是理想……」孩子被歌聲嚇到儍：「如果原來根本唔畀我自己設計，咁阿媽就唔好一早話畀自由我啦，咁即係阿媽冇信用！」
孩子忽然見到牆上貼着金句：「愛是恒久搵笨，不講信用，不喜歡公平，只喜歡歪理，凡事聽話，凡事舉手，凡事擁護，愛阿媽是永不止息的。~阿媽」