卿姐近日同振英哥連場筆戰、口水戰，佢哋一個係立法會議員，一個係行政會議成員，劉慧卿噚日開記者會時都講笑話，成日講要改善行政立法關係，但梁振英有嘢都唔試吓直接問佢，只係識玩公開信。Emily舉咗兩例，其一係個幾月前，行政立法兩會成員共進晚餐，當晚振英哥有段時間坐正喺Emily身邊，但成晚都冇出聲問過佢係咪支持台獨，事隔冇耐竟然搞咗封公開信問佢六大問題。另一例係好幾年前，Emily有次喺報章撰文，助手將「金無足赤，人無完人」打錯一個字，成為「金無足稱」，梁振英即刻打電話取笑Emily，「你係咪想笑人呃秤？」但點解到咗台獨呢類「大是大非」問題，振英哥又會忽然唔記得Emily電話冧巴？
傳真︰2623-9278
電郵︰