噚日係一年一度嘅立法會議員與記者同樂日，係呢屆四年任期中最後一次。過咗呢晚，下屆立法會勢必大洗牌，明年今日都唔知有幾多人坐得番喺度，所以議員玩得特別放。
可能北京近來一輪文攻武嚇見效，同樂日嘅氣氛可謂前所未有咁愛國，第一個活動係鬥快拼中國地圖，包尾嘅竟然係主席范太同自由黨黨魁田北俊坐鎮嘅主家席，莫非佢哋不符愛國治港者條件？
張文光唱出大學時睇《東方紅》學識嘅《歌唱祖國》，重話差啲想唱曾憲梓飲歌《沒有共產黨就沒有新中國》，因為當時自己真係好左。到自由黨唱《半斤八兩》時，主席田北俊竟然走咗，大家無緣聽到身嬌肉貴嘅田少唱出「我哋呢班打工仔」。
全晚最瘋狂一刻，要算「立會女子十二樂坊」，除咗余若薇、劉慧卿、陳婉嫻等十位女議員，李華明同朱幼麟都願意犧牲色相，李華明紮咗條孖辮，都唔及朱幼麟一身露肚腩「豔女」打扮搶鏡，飛天朱重戴埋金色假眼睫毛、鼻環同金色頭飾，一見佢哋出場，冇人再肯留喺位上，全部湧晒去台前尖叫。
傳真︰2623-9278
電郵︰
