嚟緊4月機迷將會有全新玩法嘅XBOX，事關籌備多時嘅XBOXLIVE將會啟動，讓機迷隨時都可以搵到伴打機，至於XBOXLIVE第一款嘅重頭戲《鐵騎大戰》，亦已經預備妥當，除咗追加大量新機體及遊戲內容外，更設有一個超真實嘅大型控制器，玩落就好似將街機搬返屋企一樣咁過癮。
記者：許福合 攝影：梁翠妍 ImageGirl：Fion
賽車用軚盤，揸飛機用控桿，而玩XBOX呢隻大作《鐵騎大戰》，就得用上一個大型控制器，像真度非常高，控制器上設有超過40個按鈕，分別負責機甲行動、攻擊及通訊，就好似坦克車駕駛艙一樣咁複雜！起初試玩時，都頗為擔心難以記得咁多按鈕嘅操作，不過因為遊戲畫面會顯示駕駛艙內部，並且會顯示玩家嘅操作，要上手並唔難。雖然控制器未設有震動功能，不過畫面會隨機甲走動而搖晃，亦頗有真實感，而最令玩家煩惱嘅係控制器佔位太多，玩得雖然過癮，但記住要預留多啲位擺放。
《鐵騎》係CAPCOM一款好創新嘅Game，早排好多機迷都玩過，而後繼篇《鐵騎大戰》作為XBOXLIVE嘅重頭戲，更係為咗網絡對戰而製作，除咗一般嘅故事模式外，另外還設有ConquestMode及BattleRoyal模式，前者就好似《Z高達》佔地得分玩法，而後者就係大逃殺網上版，眼見到嘅敵人要盡數清除，聽落就好簡單，但遊戲時隨時會有被擊中嘅危險，而且XBOXLIVE會記錄玩家嘅表現同官階，萬一戰死沙場就要重新玩過，所以控制器上特別設有逃生鍵，方便玩家棄甲走路！
網上遊戲一向講求合作性、發揮團隊精神，而《鐵騎大戰》亦設有對戰模式，最多讓10個人作5對5戰鬥，除咗可以發揮最大攻防能力，更可以更換機甲駕駛，另外亦可交換遊戲取得嘅物品。另外，XBOXLIVE還支援語音對話，隨XBOXLIVE套裝附送對講耳機，只要利用控制器上嘅通訊鍵，就可以隨時與隊友商討最新戰情，決定下一步戰略。可能有新手會擔心上網玩會立即成為炮灰，小記就提議各位新手以隨碟附送《鐵騎》第一集先操弗自己，夠本錢先再上網應戰！
遊戲資料
遊戲類型：射擊＋動作
對應機種：XBOX
遊戲人數：1人（支援LIVE）
行貨售價：$1,399（連專用控制器）
開發商：CAPCOM
(c)CAPCOMCO.LTD
XBOXHK
查詢電話：800964215
