期指結算後，大市再現急升，恒指高收13907，大升232點，重上10日線（13801），且成交亦上番200億水平，地產同電訊股係升市最大嘅功臣，3大地產股，升幅由2.7%至4%不等，而中移動（941）升0.75元，升幅2.7%。地產股明顯轉強，投資者入市更有信心。
國企指數高收5102，再升84點，5大全部報起，以中國鋁業（2600）個勢最勁，升幅3.2%。噚日尾市，有兩隻中資股有大動作，有大盤好大手咁掃上去，但亦有盤刻意㩒番低，結果中銀（香港）（2388）就嘜到上15.9元高收（買賣價15.7元對15.75元），而華能國際（902）掃上15.1元後，幾下手勢，又質番落14.75元收市，但仍有0.4元進帳。
滙控（005）同恒生（011）下禮拜一派成績表，滙控業績靚，雖係預期之內，但對中銀亦會有刺激。中銀上兩次披成，一次13.7元，一次14.75元，都係基金大手接去，即使以較為保守的獲利目標3成計，佢哋嘅目標價應在18元過外。
好多國企基金都揸重貨，安徽海螺（914）更幾乎歸晒邊，芬佬要佢升或跌，真係話晒事。去年12月底，推介海螺，話「震倉完成，等見12元」，家下目標接近完成，可候機回吐，亦可繼續持有。海螺喺12元樓下整固得愈耐，日後破位而上個勢就愈勁，估計今年應可上到15元。
兩個月來，基金有買有賣，但以增持者佔多數。減持嘅係澳洲CWBank，由6.11%減到4.86%；增持嘅就有CapitalGroup，持股量由7.04%上升到11.9%，而摩根大通亦由5.25%增持到7.04%。
水泥價格持續上升，而內地基建及住房興建對水泥需求極為殷切，因此業界預期價格漲勢可維持多一兩年，對海螺非常有利，公司配股集資已用作興建新廠房，完成後生產量可提升30%，未來兩三年，盈利可保持高增長。
大行報告指海螺盈利增長勁，建議買入。花旗美邦估計海螺04年度（12月年結）每股盈利0.98元人民幣，大升85%，而05年度會再升35%至1.32元人民幣（折1.24港元），以05年PE12倍計，股價已可見14.8元。
郭兆誠