杜德偉同名模女友周汶錡之前被傳分手，但佢哋之後又話感情冇變，日前杜德偉去台灣東風電視台做《塔羅魔法心》節目嘅嘉賓，佢玩塔羅牌測感情，結果冇張好嘢，所以佢成晚黑口黑面，心情重好沉重。
杜德偉話𠵱家同女友都以工作為重，所以聚少離多，在場嘅塔羅牌占卜師用國語話：「在感情的世界裏，你會將責任一肩扛在身上，非常累、非常辛苦，而她在兩人關係裏則掌控了大權，我建議感情維持現狀。」
占卜師又話周汶錡有人追，好有機會同佢分手，杜德偉聽完即刻臉色大變，睇嚟佢重係好緊張周汶錡。主持人天心見到杜德偉咁，即時好醒目咁轉話題，問占卜師杜德偉有冇包二奶嘅命，佢竟然話杜德偉有呢個命，但係包二奶一定會俾傳媒踢爆。
陳敏之舊愛揚明早前去卡拉OK玩，點知最終樂極生悲俾人打。噚日陳敏之喺尖沙嘴出席活動時就話：「今晚揚明生日都會去卡拉OK慶祝，因為太多朋友，個個要拍劇收得夜，邊有地方可以容納咁多人？所以我哋搵咗間冇咁雜，而且同經理講房門封玻璃。」封晒玻璃係有效，但馮仁昭覺得唔好飲咁多酒重好啦。
香港電視專業人員協會噚日成立，喺金鐘舉行記者會，榮譽贊助人范徐麗泰、主席汪明荃、會長徐小明、副會長林小明同張衞健都有出席。張衞健話：「喺內地拍劇有事都唔知搵邊個，冇理由搵胡錦濤啫！𠵱家我喺內地拍咁多劇，有啲都收唔到錢，加埋成幾百萬。」
唔少國際藝人都希望同李安合作，但韓國女星金喜善就唔係太稀罕。韓國報紙話李安兩兄弟最近計劃合作拍電視劇，頭號女主角目標係金喜善，重出到十六萬港元一集利誘。但金喜善嘅回應係：「如果喺韓國以外嘅地方拍就唔好啦！」金喜善話與其做國際巨星，佢寧願留番多啲時間同韓國fans親近吓，認真巴閉！
歌手彭家麗早前遇到「扑頭黨」，破財之餘重俾人扑穿頭，導致頭骨破裂。雖然彭家麗已經出院，但係頭骨破裂咁大件事，應該重有大把手尾跟。佢噚日接受商台電話訪問時話：「我頭入面有一個裂痕，如果裏面滲血，啲血通過裂痕內嘅中間點，入少少我都會死。最驚啲腦水重積聚咗喺度。我重想開演唱會，唔想死住。」
王海峰旗下嘅星皓影片噚日入稟區域法院，向高森（香港）影視貿易有限公司追討二十四萬元。入稟狀指「高森」於去年五月六日開出二十四萬元支票予「星皓」，但支票未能兌現。「星皓」去年曾發律師信畀對方，但多次追討仍未收到款項，現興訟要求對方支付二十四萬元連堂費及利息。
案件編號:DCCJ1038/04
