尖沙嘴君臨天下以呎價超過九千蚊開售，附近賣緊五千零蚊嘅擎天半島即時受惠，造價節節上升，令原本已經鬧哄哄嘅短炒買賣，一時間因為出現多宗業主賠定個案，氣氛更加激烈。
香港置業葉展均話，淨係今個月，擎天半島已經錄得近十宗賠定後再轉手嘅成交，好似啱啱重售成功嘅三座中層E單位，由賠定至再度易手前後唔夠七日，樓價升咗近12%。
原業主喺舊年一月用五百一十萬買入，原本喺上個禮拜以六百七十萬賣出，後來原業主見個價係咁升，估計賠定連佣金，再賣重可以賺多啲嘅機會好大，於是賠咗二十萬定金畀上手買家，連兩邊佣金，總共使咗三十零萬。
重新放盤唔夠一個禮拜，果然有買家畀到七百四十八萬，呎價五千八百七十一蚊，計落多賺近四十五萬。
近排兩個九龍豪宅新盤勢均力敵，恒隆地產落力推銷尖沙嘴君臨天下，長實都唔弱，製作咗一輯新電視廣告，宣傳佢哋嘅紅磡摩天大廈海名軒。聽長實講，今次段廣告片，用咗成三百萬製作費，重遠赴非洲草原拍攝。
發展商話，為象徵樓盤嘅豪宅氣度，用咗四個字去演繹，就係「有名則貴」嘞，之所以用樓盤個「名」字，主要係想帶出名氣同貴氣。段廣告片，開頭激昂嘅擊鼓聲，氣勢都算幾強勁，唔通順便寓意樓市嘅熱度一樣咁勁？
灣仔莊士敦道嘅市區重建項目，有好多值得保存嘅古舊唐樓，好似船街十八號，歷史要追溯至1930年代末期，當年謝氏家族卜居於此，開枝散葉至今，市建局林筱魯噚日細說收購呢幢樓背後嘅故事。
話說一直住喺呢度嘅謝老太，好唔捨得但又要賣，諗住幢樓就嚟拆，叫晒分散各地嘅家人返嚟食餐飯作最後回顧，後嚟政府將呢幢樓列做歷史建築物，當謝老太知道舊居得以保存，又開心又感動，重話要打個金牌送畀市建局多謝佢哋。
不過林筱魯話，咁貴重嘅禮物當然唔可以收啦，犯法㗎，所以就同謝老太講好，物業復修後，謝老太可捐一兩件好似相片呢啲有歷史價值嘅紀念品，將來畀公眾有機會睇到，緬懷吓呢度昔日嘅舊事。
謝家同市建局同事嘅關係，未有因為收購完畢而結束，因為佢哋喺上環買咗一幢舊樓自住，咁啱就喺正市建局新紀元廣場總部附近，所以大家成日都見到面。
太古鰂魚涌逸樺園最後一個空中花園單位，噚日終於揭曉花落誰家，中原吳炳森透露，買家住開南區幾千呎獨立屋，一直好有興趣買番間空中花園單位，一嘗居高臨下嘅感覺，可惜呢類新盤市場選擇唔多，噚日專程去逸樺園參觀，睇完之後二話不說就扑槌，唔使講價以一千五百二十萬成交，單位一千七百三十七呎，呎價八千七百五十一蚊。
買家由睇樓至完成交易，只花咗兩個鐘頭，就用一千五百萬嚟過吓癮，唔打算長住，情況就好似住開九肚山嘅玩具大王蔡志明，去年失驚無神用八千幾萬買入紅磡海名軒頂樓一樣。
本港住宅樓價經過五年幾跌市之後，終於回升，但英國倫敦中部就唔同嘞，樓價十一年嚟首度回落。萊坊國際物業報告話，倫敦中部嘅住宅樓價，舊年跌咗一點九個巴仙，原因係舊年上半年樓價下滑百分之六點六，所以就算年尾回升，都唔可以力挽狂瀾。不過，萊坊對今年嘅市道就幾樂觀，估計可升百分之六。
租務市場方面，舊年跌三點九個巴仙，比○二年嘅十點四細好多。由於預期就業市道表現理想，加上高檔住宅供應少，可以帶動租賃復甦。
蘭西
電郵地址：