期指結算後，淡友正想話休息一下，點知市場傳滙豐（005）業績好正，其他藍籌股表現都唔會差，加上有個基金入市狂掃地產股，搞到淡友忙於平淡倉止蝕，港股大升232點，收13907。新地（016）單日勁升逾4%，今次入市追捧地產股的資金來勢洶洶，後市可能係地產股天下。
地鐵（066）連跌兩日後，噚日跟隨地產股反彈，升近3%至12.35元。有議員驚地鐵小股東在兩鐵合併中蝕底，要求政府提供股份回購保證。阿虎作為地鐵股東，真係多謝晒。議員點解為咗投資者利益而要政府犧牲公眾利益呢？地鐵股東多，確實係一個頗重要票源。不過，阿虎為咗公眾利益，手上一票絕不會投畀呢一類議員。
生命科技認股證（1074）噚日掛牌，即見買盤入市追捧，一度升至0.148元，較發行價0.078元高出90%。不過，正股生命科技（1180）一度被質低8.5%至0.194元。Cookie話，聽聞今次股證承配人，大部份會有秩序行使換股權，然後在市場沽正股，讓公司進一步集資。
美蘭機場（357）連續兩日皆勁升逾10%，收8.05元。有消息話美蘭收購三亞機場談判接近尾聲，可能會發行新股收購。不過，噚日似乎唔見大戶入市托價，連中資買盤都唔多，只係見散戶買賣較多。黑客話，據講在外資眼中，美蘭股價升至8元以上，已經到晒價。
新時代集團（166）噚日出現兩宗大手成交上板，逾1.2億股，相當於28%股權，每股作價0.28元。
市場傳呢手貨來自前大股東KandyProfits。
阿虎