大市果然轉勢，重磅股中移動（941）升近3%，為恒指貢獻48點升幅，昨日介紹嘅中移動Call輪9210同9116，分別有9%同16%進帳。電訊股表現雖然不俗，但論氣勢，卻還遜地產股1籌，尤其是新地（016），單日大升4%，恒指有24點升幅多得佢。
正股出色，新地Call輪自然生猛，是日10大升幅窩輪，佢哋佔4件。當中升幅最大係9323，跳高3成7，現價63仙，溢價6.3%，槓桿率12.1倍，5月28日到期，數據可接受，勝在交投旺，方便炒作。9164升29%，年期短啲，玩到4月23日，現價55仙，溢價3.8%，槓桿率13.9倍，睇好正股嘅話，呢件玩得過。
恒地（012）亦強勢，大升3.4%。相關Call輪當中，9480表現最好，升近22%，現價36.5仙，溢價10.2%，槓桿率10.9倍，7月19日屆滿，數據不過不失。恒地輪普遍交投疏落，9480是日成交1.9球，已經算係「活躍」嘅1隻。
神仙股文化傳信（343）又升5%，兩個星期由32仙飛上60仙，升近9成，都幾得人驚。文傳有件公司輪2306，同期狂升1.5倍，昨收42仙。2306相當長壽，明年7月始到期，卻有負溢價2.5%，但由於非常價內（行使價17仙），槓桿率得1.4倍，並不吸引，況且正股喺短時間升幅咁大，窩輪有負溢價，可能意味正股就快調整。
章盛