寫開求籤，就有讀者反應，一位來電郵送上著名紫微斗數專家，屬大師級嘅王亭之嘅一篇文字，詳解劉皇發喺車公廟求到嘅中籤。左丁山問王亭之弟子編輯L，編輯L話未見過，唔知師父寫過一篇咁嘅解籤雜文，於是按下不表。但內裏有一句幾有道理，因為籤文第三句「上古守明金重利」，文字唔係幾通，按王亭之話，此句係印錯字，連車公廟中人亦唔清楚，其實應該係「上古守朋今重利」（即係話：古時注重朋友之情，今人只重利益），以呼應頭兩句——「人情翻覆似波濤，勿謂金蘭結義高」。
一位女讀者Jo，應屆會考生竟然電郵一籤，要求左丁山解籤。千祈唔好當左丁山係解籤佬，只因你話係第二次會考，亦係最後一次會考，故此幫你一個小忙，以後下不為例，唔會再答。你為會考而去黃大仙求籤，得第八十四籤中籤：「滿腹奇才志未沖，鐵雞難舉意無容；張良指示身投漢，項羽烏江命自窮。」此乃韓信棄楚歸漢故事，韓信懷才不遇，雙手雙力，舉唔起一隻鐵雞，俾人笑到面黃。後遇張良，張良叫佢加入劉邦陣營，果然後來成為大將，大敗項羽，輔助劉邦做漢朝開國皇帝。照字面及故事解釋，Jo要遇上貴人開解先至掂，以現代語言講，你須碰上一位好老師指點、輔導，先至會出人頭地，淨係靠你自己苦讀，唔會好掂，換句話講，要有一位仁兄仁姐同你開竅，自然一理通百理明。籤文大意如此，千祈唔好太過掛在心頭，凡事要以平常心視之，切勿太緊張呀！