大嶼山唔止大澳出名，二澳一樣係遠足發燒友嘅樂土，因為二澳有同桂林象鼻山幾分相似嘅迷你版「象鼻崖」，加上附近有座雞公山，山下煎魚灣有個堪稱港境極西嘅連島沙堤，沙堤連住對面嘅雞山島，潮退可一嘗步行過海滋味……
記者、攝影：陳震霖
模特兒：Yoee
大澳巴士總站落車，起點鳳凰徑第7段，經南涌村、梁屋村向番鬼塘方向進發，路在口邊，唔識路開口問附近村民，30分鐘就會到達番鬼塘村。番鬼塘村？村名咁得意嘅？話說以前大嶼山盛產海鹽，早喺宋朝，朝廷已經派地方官管理鹽務；到清初，朝廷得荷蘭人協助平定台灣，所以批准荷蘭人喺大澳停泊貨船，位置就喺𠵱家嘅番鬼塘村附近，荷蘭人係洋鬼子，人稱「番鬼佬」，村前咁啱又有魚塘，咪叫番鬼塘村囉。
離開番鬼塘村，繞牙鷹角入二澳，二澳舊村係條廢村，老早十室十一空，奇就奇在村入面間海神古廟重新簇簇，可惜廟門關閉，睇唔到間廟供奉邊位神祇，不過廟前有條石屎橋，左右兩邊旗幟各一，望真，旗幟上寫「大王」同「聖母」，估計應該保佑出海作業嘅漁民。
廟後大片焦土，因為之前二澳經歷嚴重山火，往後嘅20分鐘山路，兩旁植物明顯受過祝融之災，某地段幾近寸草不生，慘不忍睹，唯獨近水嘅紅樹林幸免於難……唉！又係呢句：「保護大自然，千祈唔好留下火種。」
往後一段鳳凰徑，雖石屎小徑與碎石古道夾雜，但尚算平坦，偶然先有小段上斜。古道中段有奇景，兩旁樹木居然同時向對方生長，造成一道天然圓頂拱門，十分有趣。過咗拱門，前行10分鐘，沿小徑直落，右手邊第一個沙灘就係煎魚灣喇。
位置始終偏僻，煎魚灣少受污染，都算水清沙幼，𠵱家天氣重冷，游水就免嘞，不如先欣賞迷你版「龍落水」喇，一組岩石伸延出海中心，似直插入海嘅龍脊，當然，叫得做迷你版，就梗無東平洲嘅正版「龍落水」咁氣勢磅礡喇。
如果你夠細心，應該會發現煎魚灣灘面有唔少細孔，其實裏面住咗唔少海蟹。海蟹一身暗紅色，但對箝就白雪雪，好搶眼，不過咪睇佢哋蟹仔細細，只要你行近少少，踎低，蟹仔會即時舉起2隻大到唔啱比例嘅蟹箝，蟹身企到直一直，擺個戰鬥格同你死過咁款。
撞啱潮退，煎魚灣右手邊盡頭會出現連島沙堤，同西貢橋咀島、石澳大頭洲、船灣馬屎洲、屯門沙洲相比，煎魚灣連島沙堤更巴閉，因為沙堤嘅另一邊，係又稱「雞翼角」嘅香港西極雞山島。夾啱時間，做摩西昂然徒步過海都無問題。不過玩時玩，要留意潮水漲退，一個唔覺意滯留雞山島，到時摩西就做唔到，反而做咗魯賓遜，要孤島待救就麻煩嘞。
玩完沙堤，唔好雞咁腳走住，因為隔籬重有個地圖上都有顯示嘅奇景──「象鼻崖」。桂林有海拔200米高嘅象鼻山，豪飲漓江甘泉，香港一樣有「象鼻崖」，不過稱佢為「崖」似乎過份咗少少，佢只不過係條彎彎哋向下直插嘅中空岩石，驟耳聽個名好英，但就連斯斯文文嘅Yoee，三扒兩撥都可以攀上崖頂，你就知道點解叫迷你版喇！
嚟大澳，當然歎海鮮，酒家提供2個抵食套餐，海鮮小菜有44款選擇，任選3款$138，5款$228，各類海魚、炒蟹、焗蠔、瀨尿蝦，碟碟夠鑊氣，好食到Yoee舔舔脷。
去程：東涌市中心乘11號巴士（$11.8），大澳總站下車，往鳳凰徑第7段起步。
回程：大澳總站乘11號巴士，返回東涌市中心。
