鄭希怡（Yumiko）噚日以三個性感造型到黃埔為佢擔任代言人嘅便服鞋行catwalk，曾經做過模特兒嘅Yumiko更跳舞娛賓，便服鞋嘅老闆專程由美國嚟香港見Yumiko，當佢贈送皇冠畀Yumiko嗰陣，未知Yumiko是否太興奮，竟然兩度將皇冠跌落地，Yumiko唯有以笑遮醜，又以唔多流利嘅英語講話跌兩次要續多一年約咁話，最後要勞煩老闆第三次為佢戴上后冠，認真論盡。
Yumiko受到重視感到好開心，佢話：「佢哋重計劃喺旺角開一間有我嗰名同鞋嘅crossover舖頭㖭，自己嘅酬勞都有近七位數字，所以真係好滿意，老闆重喺美國特登帶咗對絕版波鞋送畀我，而送皇冠嘅意思係代表我係新一代嘅跳舞天后，唯一唔慣嘅係要喺條腰度紋上印水紙囉，因為咁樣真係好痕呢。」
莫文蔚（Karen）噚晚係灣仔演出舞台劇《再生緣》最後一場，佢胞兄莫理斯、導演彭浩翔、陶傑同古巨基等都去捧場。Karen喺舞台劇度有句對白提到舊愛周星馳同趙薇嘅緋聞，佢話：「提『星仔』係導演嘅意思，佢可能鍾意古靈精怪嘅對白。」
曾志偉同陳百祥噚日聯同明星足球隊到黃埔出席活動，陳百祥話志偉有意搵一啲特別嘅藝人加盟東魅，志偉就好抵死咁話：「既然成龍都搵佢個仔，不如譚詠麟就……叫佢搵啲新人啦。」當記者提議搵埋阿倫個仔，志偉又話：「乜阿倫有仔咩，真係奇怪問埋啲咁嘅嘢，唔知點答你喎。」志偉又話東魅將會投資六千萬搞一個負責唱片及經理人嘅部門。
