大市反彈，恒指雖只上升75點，但國企指數則大升116點，而且大市升勢頗為全面。收市後同芬佬傾開，佢哋話藍籌股弱勢重未扭轉，短期市場注意力將集中在國企身上，特別係金屬股會有大作為。
下個月，國企進入業績期，芬佬有信心，國企嘅業績會靚過市場預期，股價有力再創新高。好多間大行都表咗態，睇好國企後市，認為指數可見5800至6000，但有一兩間信心爆棚，認為今年中國指可上到6000水平，但呢個只係短期目標，今年下半年上升水位仍然好大。
大行睇好金屬、石化同電力股，而噚日亦係前兩類升得最勁，3隻鋼鐵股升幅由4%至5%不等，早輪定下嘅短線目標，重鋼（1053）4.6元，噚日收4.7元，已經超額完成，而馬鋼（323）收3元，亦好接近3.2元嘅目標。噚日收到料，有大行又調高鋼鐵股嘅目標價，重鋼去到6.0元。
石化股最強係北京燕化（325），升幅4.8%，上海石化（338）亦有3.7%進帳。去年底以來，石化產品價格持續上漲，今年首季，石化股業績肯定再創新高，大行報告認為，石化股股價今年會有2至3成的上升空間，特別係中石化（386），06年開始，幾大合資企業將投產，更具有長線投資價值。
永成化工（850）衝破0.41元的三角形頂部阻力後，急升上0.45元，才出現後抽，回落到0.415元，噚日升勢再起，高收0.44元，調整似已完成，再破位而上，短線目標0.52元。
去年12月底推介永成，當時股價0.33元，家下雖然升咗3成，但由於公司業績有良好進展，中長線仍可看好。永成最近先喺瑞士簽咗單大合約，好快可以開工，以永成現時3數億元嘅營業額計，新項目嘅「晒士」可以話係好具爆炸性。
04年度（3月年結），預測盈利調升，由2200萬元增到2500萬元，每股盈利6.1仙。05年度多咗瑞士項目同新接玩具廠嘅定單，最保守估計，盈利可超過3000萬元，每股盈利7.3仙，以1年計，股價應可升上0.6至0.7元。
郭兆誠