香港人向來係經濟動物，近排日日俾土共叫囂疲勞轟炸講「愛國」，新老左口魚飛身撲出交心，遭受重點誹謗謾罵嘅民主派人物亦趁機抒發情懷，何俊仁噚日喺香港發展論壇上就有感而發話，「我六十年代已經流下愛國第一滴淚！」仁哥話當年有個死黨個大佬，千辛萬苦想偷渡嚟香港，但次次都唔成功，最後浸死在大鵬灣，仁哥問：點解有人民寧死都要咁做呢？呢啲就叫做「愛國誠可貴，舔共價更低，若為自由故，抵壘就威威」。
噚日論壇上人人大談「愛國」，有人發出非理性攻擊，話香港人「國歌」都唔識唱，遑論愛國（錯，本來有班識唱「三民主義吾黨所愛」國歌嘅中國人，本來住晒喺調景嶺）「阿牛」曾健成即時彈起身話識唱《義勇軍進行曲》，不過冇乜人拍掌。聲稱自己係單打獨鬥，點知原來係土共反民主先頭部隊嘅劉迺強，則破口大罵記者好問人權報告，雙方糾纏幾分鐘，不歡而散。
傳真︰2623-9278
電郵︰