大佬曾蔭權慘受土共煎熬，細佬警隊前一哥曾蔭培就他條嘞，加入城市大學做特約教授，噚日第一次開金口，講題當然唔係一九六七年警隊剿滅港共暴動嘅英勇史，而係喺行政人員工商管理碩士課程講授「如何在轉變中維持穩定」，佢話當年同前保安司黎慶寧，同庫務局局長鄺其志打足心理戰，先爭取到撥款建警察總部。佢話黎生擔心其他紀律部隊會跟風問政府攞錢；鄺生就最緊張邊個畀錢，於是乎曾Sir先向黎慶寧保證警隊可自給自足，又向鄺其志提出交回灣仔宿舍做交換，終於成功冧掂政府。
退休之後，曾一哥風采依然，名額五十人嘅講座，足足吸引咗四百個學生嚟聽書。曾一哥話𠵱家生活優游，去啲應酬酒會少咗，瘦咗五磅。至於係咪過檔新世界，同埋大佬「曾愛國」近來嘅表現，一哥都笑笑口話冇回應。
（圖）曾一哥第一次講座，就吸引咗四百個學生聽書，超晒額。
傳真︰2623-9278
電郵︰