日內瓦車展資訊日日新，好似福特Fiesta將會喺展覽中陳列一款走高性能路線嘅FiestaST型號，廠方特別為其換裝有全新車頭及車尾泵把連整流器、車身兩側裙腳、車尾定翼、跑車尾喉，同埋17吋跑車合金胎軨連高性能輪胎組合，十足小跑形象。
車廂方面，除了空間來得寬敞外，前排一雙以黑紅兩色作配搭嘅跑車桶椅，擁有十足嘅承托力，就算高速走彎時亦毋須擔心跣來跣去。當然唔少得有把持感十足嘅高級真皮軚環、金屬跑車腳踏、兩邊刻有ST字樣嘅門檻，同埋備有銀白面板裝飾嘅中控台啦！
廠方亦特別為其換裝上一台2.0公升DuratecST引擎，馬力輸出高達150匹，用以驅動此車可謂綽綽有餘；新車將會響年底於英國市場推出，暫未知道是否會登陸香港。