噚晚灣仔君悅好墟冚，皆因舉行「傑出領袖頒獎禮」，中大醫學院院長鍾尚志同沈祖堯教授代表威院抗沙士醫護人員上台攞公共事務獎，講番上年三月嘅難忘經歷，全場企立鼓掌致敬。
即將前往巴布亞新畿內亞行醫嘅鍾大夫話，自細就夢想去第三世界服務。佢做善終服務嘅太太Anne會等佢安頓後先去同佢會合。
同場出現嘅袁國勇就被問及領袖同愛國觀，佢認為孫中山係中國最傑出嘅醫生，自細佢做中醫嘅阿爺就教導家中掛着嘅對聯，「用兵用藥同變化，為醫為藥一權衡」嘅意義。至於人哋講愛國愛港，佢就話同夫婦之道一樣，有三個標準，包括好似佢妻子咁，當佢氣餒時幫佢走回正軌、對佢充滿慈愛同忍耐、而且態度謙卑有禮。
俾班立法會議員叫佢做「肥龍」嘅強積金前行政總監許仕仁噚晚做大會評委會主席，佢塊面明顯清減咗，但老許話其實唔係瘦咗好多，重即時拎個大肚腩出來「示威」，人哋話年紀大，瘦少少好喎！睇嚟老許仍須努力。
傳真︰2623-9278
電郵︰