紡織股舊年當炒之時，經紀黃曾經同小初品題廣興國際（1131），結果收尾隻股真係獲星洲芬佬垂青入局，點知噚日廣興竟然被勒令停牌，重話係因為聯絡唔到管理層咁大件事。
小初心諗，唔通同上次艾克國際（8179）事件類同，豈料垂頭喪氣嘅經紀黃話，江湖傳聞事件唔係咁簡單，可能重係大件事嗰隻。佢重話，因為見到近排有大行出報告推介，所以叫客仔買咗多少，今次唔知點交代先好。小初除咗口頭上安慰佢，真係唔知有咩好講。
另外，經紀陳噚日同小初講，中資股份獲阿媽注資古仔，好似又再盛行，繼噚日市場傳出中遠國際（517）將有注資行動後，據講前日股價急升嘅中航技術（232），亦將在短期內獲母公司注資，故此股價可以看高一線。
中航技術雖然個名好似同航空業有關，但公司業務向來與航空方面冇乜關係，今次公司等待多年，終於獲阿媽照顧。前日急升後，中航技術噚日平收0.27元。
慕容小初