星期六日在家，遍閱十大報紙，睇睇吓，發現一個奇怪現象，不吐不快。本來寫出嚟，驚俾肥佬黎鬧多事，不過諗深一層，肥佬大概已經知得好清楚，搵到對策喇啩？
西九龍「豪宅」「君臨天下」開售，廣告賣得幾犀利吓，好幾份報紙都有雙全版doublespread廣告，收錢收到眉開眼笑。呢個樓盤據講地價便宜，現時碰上市道轉好，售價（每平方呎）九千元以上，發展商恒隆集團一定賺到笑，照計唔志在廣告費，何解《蘋果日報》獨冇「君臨天下」廣告呢？唔通《蘋果》廣告無效力？《蘋果》唔賣得？《蘋果》冇人睇？你去問吓廣告界啲mediabuyer，就知道答案：一啲都唔係。但點解除咗「君臨天下」之外，《蘋果》一個樓盤廣告都冇呢？
有人話肥佬黎得罪人多喎，但記得以前《蘋果》都有唔少樓盤廣告㗎，𠵱家點解到咗樓市轉角，形勢大好之時，《蘋果》反而一個樓盤廣告都冇？左丁山只係睇到現象而覺得奇怪啫，完全唔知道內裏原因。唔通，香港地產界落咗一道封殺令？木宰羊。繼續係咁落去嘅話，黎老闆怎麼辦？
講起「君臨天下」，莫講話左丁山冇錢買，就算買得起，都唔敢住。自己個頭好細，唔敢戴咁大頂帽，假若有人問：你住響邊？答：君臨天下。嘩，雖是實情，口氣太大啫，做人都係謙啲好，如果你話住響寶翠園、世紀大廈、玫瑰花園，人家隻耳仔聽得好舒服，「君臨天下」喎，你係皇帝咩。呢間大厦英文叫TheHarbourside正好名副其實，意思與「君臨天下」差得太遠咯。