投資者大舉入市買市區住宅，將樓價大幅推高，部份投資者轉投新界區造價仍低的物業。世紀21上水分行經理張銘均透露，一個一直投資開豪宅嘅投資者，今個月內已動用二千幾萬，掃咗二十個粉嶺同上水區嘅住宅單位，包括私樓同埋居屋。
呢批單位全部係以市價購入，例如最新買入嘅上水海禧華庭一座中層H室，五百五十呎，成交價一百一十四萬，呎價二零七三；佢嘅策略係價啱就賣，否則留作收租。
張銘均話，呢個投資者重計劃用多二、三千萬，再買二十至三十個新界北區單位。
張銘均補充，今個月新界區嘅投資者入市比例，比上月多咗三成，樓價就升咗一成，但相對市區嘅升幅仍算細。因區內單位多能以叫價成交，令到業主心態開始轉強。
我哋見到嘅大廈通告，通常都係好公式化咁話畀住客聽，幾時停電、幾時無廁所水、無食水供應等。不過，最近新昌管理有新搞作，搵咗國際知名品牌專家設計咗一對卡通人物「新昌小姐」同「新昌先生」，將啲管業通告整到好「人性化」。住戶睇見啲公仔咁得意，都會留意吓啲內容，咁就可以成功將啲訊息話畀住戶知。
管理公司收得管理費，自然要畀住客知道佢哋存在，除咗日常交足功課，得閒搞吓呢啲新意思都幾新鮮。
近期市場幾乎日日都見到短炒獲利成交，最近重出現「摸上摸」嘅個案。美聯助理董事曾志光話，單位係鰂魚涌太古城龍山閣低層D室，七八八呎，三房間隔。
呢個單位舊年十二月以接近二百一十五萬賣咗，上個月以二百二十五萬摸出，啱啱又再次摸出，成交價差不多三百零九萬，兩個零月，已升值近四成四，呎價三九一九蚊，比市價平些少。
曾志光指出，個單位能夠出現「摸上摸」嘅情況，原因係呢類單位市場放盤少，而買家咁啱又要搵三房單位，所以咁搶手。
不過，曾志光講，太古城今個月有百二宗買賣，但只得七、八宗係摸貨，所以市況仍算健康。
引起全城哄動嘅尖沙嘴君臨天下，聽日正式揀樓，但係本報就收到讀者投訴，話發展商售樓處職員提供嘅資料有誤導，指樓盤前面嘅建築物（即係西九龍文娛藝術區）只係得五層高，佢從朋友口中得悉，嗰幅地皮地積比率有三倍半。
不過，蘭西就試過親身喺售樓處，聽到職員對睇樓客講，前面建築物嘅高度大約十五層高，資料冇問題喎，係咪讀者遇到嗰個職員搞錯呢？就真係唔知嘞，發展商最好留意吓啦。
西九龍文娛藝術區𠵱家重係一幅空地，部份地方用嚟泊車。蘭西翻查資料，西九龍文娛藝術區嘅天篷高度由五十米到一百三十米，物業樓高應由十五層到四十層。照睇對君臨天下部份單位嘅景觀，日後或多或少都有影響。
為咗鼓勵員工努力促成生意，代理行或者物業顧問行，都會設唔同嘅獎賞嚟刺激員工嘅工作熱誠，例如屋之島送QueenElizabethⅡ郵輪之旅。行程係由日本橫濱到香港，全程十日。結果由商業部兩位女將奪得。
聽講呢兩位女將過去半年嘅佣金收入有幾百萬，認真厲害。佢哋話會盡情玩個痛快。佢哋重透露，爭奪呢個獎其中一個目的，係想喺旅途中搵番個如意郎君喎。
蘭西
電郵地址：
