噚日喺陳啟宗個口水壇，民建聯主席馬力以行動嚟表示對東道主嘅尊重程度，成日釣魚瞌晒眼瞓，但係一有國家官員到場，佢就睡意全消，鬼咁生猛，話說民建聯噚晚搞咗一個有關居港權嘅講座，搵咗中聯辦三位署長助陣，坐喺台上，冇乜點講嘢。講座嘅主角係民建聯主席馬力同埋立法會議員蔡素玉，講咗一大輪，終於踏入正題。其中一位中聯辦官員彭署長慌死俾人話干涉特區事務，聲明今次係應蔡素玉邀請，來「聽大家講嘢」嘅。
無耐就輪到蔡素玉呼應，佢對住班大陸子女家長講，要喺香港爭取居港權係好難嘅，返上大陸，同中國官員傾就唔同，言下之意就係，只有逢北京必對嘅民建聯，先幫到爭取居港權人士。八方喺呢個時候先至恍然大悟，呢個係一個以講座為表面，以拉票為主體嘅搭雞棚選舉活動。中聯辦親自同蔡素玉做人肉布景板，係幫咗佢定害咗佢，九月就知咯。
（圖）馬力喺陳啟宗個論壇瞌眼瞓，好唔畀面啫。
傳真︰2623-9278
電郵︰