阿董成日話，要維持強勢政府、行政主導，但現時，土共搞局，一手掀起愛國極左文革式批鬥大會，搞到全香港烏煙瘴氣，左仔奪權、鄔曾干政，廢董隱形，剩番個煲呔曾，加一個林瑞麟，李國章，三個重有啲愛港之心，話「香港人整體愛國」、「唔好再爭論愛國，要集中諮詢政改」、「未聽聞香港有人叛國」，點知佢三個講一句，土共批駁一句，搞到個政府冇晒權威，由此可見，對董班子落井下石輪姦、一有機會就出嚟廢特區政府武功嘅，唔係香港人，而係土共左仔。
土共自從一九六七年暴動慘敗，一直都對香港呢個地方恨得咬牙切齒，對於由殖民地過渡嚟嘅政府公僕，仇恨入骨。佢哋以為一到九七，就由佢哋揸莊話事，點知中國政府冇佢哋咁癲，知道土共成事不足，敗事有餘，老鄧就話：「主要防左」，治港班子，「左翼要少一點」，商人治港，留用公僕，土共長期精神抑鬱，一有機會，就瘋狂咬噬洩憤。
所以今次佢哋不但狂咬李柱銘、司徒華，重噬埋曾蔭權、李國章、林瑞麟，氣燄囂狂萬丈。一時話香港人係狗、一時又狂哭當歌，充滿精神病患者症狀。
土共癲入骨髓，連有啲思路略為理性少少嘅，都覺得唔妥。例如前日，民建聯前主席曾鈺成，總算講番一句人話，喺一個研討會，曾鈺成附和何俊仁所講過嘅，話「愛國唔一定要愛黨」，重話未聽過有中國官員有咁嘅要求。言下之意，即是本地土共，假傳聖旨，佢哋食咗弗得丸，喺自己嘅幻覺之中享受緊高潮。
土共享受緊虛擬高潮，全港市民就要更加團結、企硬，從旁欣賞，不妨拍掌，千祈唔好慌張。時窮節乃見，政務司司長曾蔭權，代表香港利益立場，針對「兩報一刊鄔曾雙沒有」（重溫一次：兩報一刊即《文匯》、《大公》、《瞭望》，鄔曾即「狗餅醫生」鄔維庸，刑事案底富商人大常委曾憲梓；「雙沒有」即黑曾所唱嘅「沒有共產黨就沒有新中國」）嘅「愛國者」生化武器，嚴正指出：立法會議員，個個都係符合基本法選出！換言之，現時六十個議員，冇人叛國，冇人犯法，毋須退席，九月亦一樣可以參選。
曾蔭權行政主導，強勢坐堂，呢啲就叫做承擔。梗係喇。再唔撐實，自己就會變為下一輪鬥爭對象。而廢董無限信任嘅「振英」，呢幾日轉入直路，就以特首及黨委書記姿態，要劉慧卿「交代」佢係咪「支持台獨」。笑話。佢係阿水？向佢交代啲乜？點解梁振英唔交代吓佢在「六四」期間嘅反共言論？唔交代吓點解有人話佢將個仔送去英國貴族公學，唔留港接受廢董一手設計嘅愛國母語教育改革？
不過，中環人語，話其實連佢都毋須交代，而係應該由呢輪時運唔係太高嘅何鴻燊交代就真：點解喺一月一日，膽敢攻擊我哋第三屆特首梁振英，話佢出身窮家，仇視有錢佬，重話佢一上台，自己就移民？愛國最新定義，可以唔再愛廢董，不過胡溫已經有暗示，邊個膽敢唔愛振英哥，即是唔愛國。賭王睇怕買錯晒，要同香港中產階級一齊移民嘅機會與日俱增咯。
傳真︰2623-9278
電郵︰