國際米蘭球星韋利經營嘅餐廳日前遭惡意破壞，無論犯案者係唔係國米球迷，韋利肯定對米蘭呢個地方更感意興闌珊，話唔定呢件事會成為佢離開國米嘅導火線。
話說前晚韋利同舊隊友布洛治所經營嘅餐廳”Baci & Abbracci”，被人用土製燒燃彈擊中，發生輕微爆炸，被迫暫時停業。事發現場重留有張匿名字條，內容係「韋利，我哋已經忍夠。你從不關心球迷嘅痛苦，唔配受米蘭呢個地方支持。我哋以你為恥，你𠵱家係時候付出代價。」
呢次帶有恐嚇成份嘅破壞事件，令人聯想同國米啱啱對AC領先兩球反輸三球有關。韋利不嬲同意大利傳媒、國米領導層同埋部分球迷關係麻麻，搞到響澳洲長大嘅佢成日都帶住個唔多高興嘅樣落場。我求大俠就覺得韋利季尾離隊機會甚高，而且可能再出國發展㖭。
車路士中場馬基列尼最近同佢經理人，大手買入瑞士甲組球會塞維特股權，成為該會最有話事權嘅大股東。話唔定馬基列尼係想鋪定後路，過多幾年退休，就過去瑞士「安享晚年」；到時一於自己話晒事，塞維特嘅教練或球員等職位任佢揀，咁就唔慌臨老會無班落啦！
足球比賽誰勝誰負，除咗講實力外，重要有番多少運氣，好似前晚歐冠盃車路士咁，「帳面」睇係作客贏史特加一比○，但全場竟然無一腳射門係中目標，入球都係拜史特加後衞美拉擺烏龍所賜。最慘都可謂史特加，下半場㩒住嚟攻都追唔返，呢啲咪就係運氣嘅分野囉。
富咸年輕領隊高文最近染上神秘病毒，為免傳染到其他球員，喺周二晚作客對韋斯咸嘅足總盃重賽開始，就無現身球場，實行遙控領軍。點知呢一着即為球隊帶嚟近六仗首次勝利。嚟緊周六聯賽主場對曼聯，唔知又可唔可以繼續用呢招，再次搞掂「紅魔鬼」呢？
拜恩下年將會成為自由身球員，好多球隊都吼住佢，最近更紛紛向佢大獻殷勤，就連球迷都唔例外。好似金塊咁，喺季初湖人作客金塊時，喺當地犯下涉嫌強姦案嘅高比仔，俾啲球迷由開場勁噓到完場，但喺噚日重返舊地時，當地球迷唔單止冇乜點噓高比仔，有時重向佢歡呼㖭！