八方噚日呼籲恒隆主席陳啟宗帶頭撕毀佢本美國護照向祖國示愛，到時就可以君臨天下嘅姿態教訓港人，咁都係為佢好，怕佢好似馬丁咁，一旦俾老共屈你勾結外國勢力，乞求外國干預香港事務嘅大罪名，到時辦退籍手續就太遲。
點知赤膊上陣為人搭台唱戲嘅Ronnie收唔到，噚日重高調宣布，成功拉咗打入荷李活嘅吳宇森大導演加入一個由美籍華人組成嘅「百人會」。陳啟宗當然係百人會嘅重要成員，唔係點會借埋恒隆喺渣打二十八樓一間房畀「百人會」做大中華辦事處吖。堂堂藝術家，埋堆搞政治做乜？何況係呢亭咁嘅劣質政治。吳宇森呢鋪真係揀錯劇本。
又Ronnie檔港發壇今日移師金鐘港麗大禮堂開壇，題目係「國家意識與普選」，下晝五點開壇，何俊仁對劉迺強、馬力已經夠激，阿仁重話會班埋阿牛同長毛幫拖，認真墟冚，訂位可致電25014923。
（圖）吳宇森導演加盟嘅「百人會」，係一個由美籍華人組成嘅組織，旨在加強「中美理解」。
傳真︰2623-9278
電郵︰