身兼集友銀行副董事長嘅立法會議員吳亮星，趁香港嘅銀行啱啱開始人民幣業務，噚日帶埋批職員去立法會，幫議員高官開設人民幣戶口，「零存款」都可以開戶，短短幾粒鐘就有十四位議員加楊永強局長幫襯。
聽聞民主派第一個落叠嘅係陳偉業，重有單仲偕，連回鄉證都冇嘅劉千石都湊熱鬧開咗個人民幣戶口，唔通想曲線向祖國投誠？唔係，盡吓孝心啫，阿石講笑話最好開戶口可以附送回鄉證，等佢返廣州探阿媽唔使逐次申請咁麻煩。
陳偉業好得戚咁攞住本新簇簇嘅紅簿仔話自己好「愛國」，星爺即刻閘住，話呢件事不涉政治；劉炳章即場攞出身上嘅人民幣，話證明自己好「愛國」，星爺亦好緊張咁否定，話容乜易班民主派揚吓叠人民幣就可以話愛國？星爺今次幫中央把關，勝在反應夠快，唐唐同煲呔，好學吓嘢嘞。
（圖）陳偉業（右）同吳亮星攞住新鮮出爐嘅人民幣紅簿仔，一臉得戚。
傳真︰2623-9278
電郵︰