正當不少車迷都期待着新一屆瑞士日內瓦車展揭幕之際，原來另一邊廂嘅福特汽車亦已準備就緒，除了展出走高性能小跑車路線嘅FiestaST同其他最新車款外，一部帶有濃厚跑車意識嘅Visos概念車，亦必要一看，其中車內多項先進配備，更會係焦點所在，話唔定佢重會成為未來汽車設計嘅新指標㖭！
記者：鄭達基
曾於去年德國法蘭克福車展亮相嘅Visos，當時已惹來不少在場車迷注視，因其外形獨特之餘，出眾性能表現更係佢嘅賣點，相信今次廠方特別為其加入多項先進設備，又會再一次掀起哄動！
於今屆日內瓦車展上展出嘅福特Visos概念車，與去年展出嘅型號相近，兩者同樣以圓潤而流暢嘅車身線條，襯以獨特嘅車首造型、大型跑車胎軨同埋雙出式尾喉等組合，望落好有跑車Feel之餘，酷似馬蹄兼透光度高嘅尾燈配搭，又可以給予尾隨車輛明確提示。
至於車廂方面，廠方特別為Visos加入不少銀白面板裝飾、獨特嘅跑車軚環等等，十足跑車路線嘅概念車風格。不過，表板則屬新組合，除中間一個大圓表外，旁邊重有兩組由SONY提供嘅高解像度LCD顯示屏，可為駕駛者帶來可靠又準確嘅行車資料。
至於SONY同樣有份參與設計嘅全新HMI（HumanMachineInterface）控制介面，亦可讓你有如操控家中電腦嘅滑鼠一樣，簡單地控制車上設備或改變設定。另一方面，獨特嘅座椅設計可讓你作多角度調校，務求適合不同駕駛者嘅座姿外，而且重係用上輕量化嘅碳纖維模造，配合現代化車身設計。
雖然響廠方嘅新聞稿中，未有詳細提及Visos概念車嘅機械配搭資料，但相信會與舊有型號相近；即以一台能輸出350匹馬力，以及40.8kgm扭力嘅3.0公升直6Bi-Turbo引擎作核心，從而令起步加速反應變得敏捷強勁，當然唔少得重有跑車化底盤結構，所帶來嘅出眾行車循迹表現啦！
