金手指果然名不虛傳，入股修身堂（8200）7%消息一出，股價應聲急彈，全日大升13.8%，收0.66元，成交增至1611萬元。
雖然修身堂勁升，但噚日高位追入的投資者可能要坐艇，皆因隻股一開已經係0.67元，而收市價低過開市價。經紀陳叫小初唔使太擔心，因為隻古仔尚未講完，而金手指亦唔係短炒之人，所以摸頂買入者，只要坐多一陣，應該會有回報。
雖然金手指咁神勇，但小初有時亦唔明佢哋嘅投資策略，好似亨泰（197）咁，舊年大搞路演，成功批股集資，兼夾引入一家星洲芬佬。不過，最近亨泰買入大慶石化（362）兩成股權後，據講星洲芬佬唔受落，不停在市場沽售亨泰，偏偏金手指人棄我取，不斷在市場上吸納，家陣已揸咗7.29%。
經紀陳話，雖然金手指不斷增持亨泰，但星洲芬佬仍然揸住唔少貨，唔知佢哋幾時又會減持，所以家陣亨泰股價雖然企硬，但都唔好胡亂追入。亨泰噚日微升1.47%，收1.38元。
慕容小初