睇電視新聞，中國大陸台商協會喺上海酒樓辦大型宴會，台商代表輪流上台發言，欲言又止，猛咁講「愛與和平」，「誰給我們帶來愛與和平，我們就投票給誰。」連扁兩人之中，邊個會給台商帶來「愛與和平呀」，啲台商話「大家心裏有數喎」，真係玄之又玄。
據講大陸台商掌一百萬張選票，單是住在上海地區嘅台灣人，就超過五十萬，多得驚人。左丁山聽到「五十萬人」呢個數字，不禁驚歎時間可以改變一切，今日嘅大禁忌、切膚之痛，二十零年後睇番，可能只係笑話一宗。
二十二年前某月，左丁山去完上海，隔咗一個星期，就去台北，同一位山東幫公子在汽車上講起：「𠵱家上海，」佢立即殊一聲，示意左丁山唔好講落去。後來到咗佢嘅陽明山公館，佢叫斟茶嘅工人退下，然後細細聲講：「慎防匪諜，亦慎防隔牆有耳。你講吓上海現況畀我聽，細細聲講。」嗰鋪緊張法，令左丁山坐立不安。
眨吓眼，竟有五十萬台灣人移民上海，你話當年啲政治幾冇謂。鄧小平、蔣經國兩人對大陸、台灣嘅開放，功勞永垂史冊。睇番當時，王維基係一名大學生，為中大醫學院之成立，與學生會搞到馬臨校長冇覺好瞓，現時王維基成為上市公司主席?中大校董，相信佢諗番亦覺好笑。做人最緊要向前看，過得十年八年，包圍金耀基校長嘅學生成為博士?高官?專業人士……相信佢哋亦會將二月十九日晚之事，盡付笑談中，如果成日想住甚麼陰謀、迫害、鬥爭，必然唔會長大，反被歷史嘲笑。