喺今屆德甲幫雲達不來梅入咗十九球嘅艾列頓，喺嚟緊嘅世界盃外圍賽可能有份打，但唔係代表巴西，而係卡塔爾。
重未踢過國際賽嘅艾列頓，日前話收到卡塔爾足總嘅邀請，出價一百萬歐元（約九百七十萬港元）簽字費另加四十萬歐元年薪，請佢代表卡塔爾國家隊。佢咁話：「我會好好諗吓。」係人都知佢恨踢國家隊，早前佢重主動出擊，話想代表德國國家隊，不過就畀德國教練禾拉請食檸檬。
其實，大把巴西球員轉國籍，好似古蘭爾同三都主就分別轉做德國人同日本人，所以艾列頓若然咁做都冇乜唔妥；況且，佢轉籍嘅話，就有機會踢世界盃，以及可以提高卡塔爾足球嘅水準，站喺球迷角度，我求大俠當然支持啦！
切爾達對阿仙奴有個「奇景」，就係大家都有個叫伊度嘅球員，重係踢中場兼有波入。叫伊度嘅球員有好多，除咗阿仙奴同切爾達外，波琴都有個後衞叫伊度。我求大俠建議電視台，喺佢哋個名前面加英文字母，例如阿仙奴嘅A伊度，切爾達嘅就叫C伊度，或者會冇咁混亂。
前晚AC米蘭作客布拉格斯巴達贏盡形勢，可惜錯失太多機會，而恩沙基同埋舒夫真高喺比賽時出現爭食嘅情景。我唔怪佢兩個，反而覺得會長貝盧斯科尼賽前嗰番唔用雙箭頭唔罷休嘅言論，似乎真係影響咗教練排陣同埋令球員多添壓力。呀總理，你都係少干預球隊好啲。
挪威華拉倫加今晚會喺足協盃對紐卡素，佢哋國內一間電台嘅兩位節目主持人就玩心理戰，打電話畀舒利亞做訪問，但就問埋啲九唔搭八嘅問題。難得舒利亞冇發火，重表現出英國紳士風度答晒啲問題。講真吖，舒利亞喺球壇咁多年，乜嘢未見過呀，你話咁易整蠱到佢咩！
兩分二十秒可以做啲乜，淥個杯麵食都唔夠時間啦，但般尼茅夫嘅後備球員希達就可以入三球；前晚佢喺一場英乙聯賽事創造歷史，喺兩分二十秒內入三球，幫球隊贏域士咸六比○之餘，重成為喺最短時間內完成帽子戲法嘅球員。家陣佢出盡風頭，唔知今夏有冇機會去超聯搵食呢？