曾錦安與妻子及四歲女兒居於淘大花園Ｅ座，去年沙士爆發期間，他們一家三口慶幸平安無事，曾先生說自己當時還不斷接受傳媒訪問，包括英國BBC、法國及日本等電視台。事隔一年，他不愁沙士重來，也不會為淘大樓價回升而喜形於色。現時他最大的願望是：可以找到一份工，擺脫失業一年多的鬱悶。 撰文：冼麗婷 攝影：黎樹雄
我從來唔覺得，因為住在淘大花園E座被人歧視；我只係覺得，啲人唔係驚淘大花園E座，而係驚沙士病毒。
舊年沙士爆發，淘大花園死咗幾十人，我一家三口託賴平安；到今年沙士季節，好多人都問我驚唔驚，我話舊年都未驚，今年驚乜，大家注意衞生喇！
………………………………
最近香港好似好番啲，我嗰個單位，四百六十二方呎，沙士嗰陣話只值六十萬，現在就升番上八十萬、九十萬。不過，我係自住，升幾多都無用。
我本人就唔好景，沙士嗰陣已經失咗業兩個月，直至現在過咗年幾都未搵到工。
………………………………
我本來喺酒樓做點心師傅，𠵱家酒樓係旺咗，但佢哋唔請人，無辦法啦！香港經歷咗咁多事，老闆都會睇定個市先。
我以前一個月人工有萬二、三，眼前無得諗喇！學歷又唔夠，年紀又有番咁上下。我試過去鰂魚涌公園做掃地，日薪一百五十，扣晒搭車、早餐、午飯，實收五十、六十，一日要做九個鐘，你話做嚟為乜？
所以政府講到天花龍鳳都冇用，話經濟好番，又有自由行，好似完全唔關我事。我失業咁耐，都無人請。
………………………………
呢個環境，人係會有啲鬱悶，有時一日唔知點過，惟有做住家男人湊吓女。但係我想話你知，我始終都信人有三衰六旺，好似舊年沙士嗰陣，我好彩啱啱失業，如果要返工，做點心呢行凌晨兩三點禽禽青落樓，烏吓烏吓，出出入入要㩒𨋢，可能已經中咗招。
做人唔好吓吓咁灰心，我信佛嘅，所以時時諗嘢都可以好正面。