買家買樓自住，多數都鍾意自己裝修過間屋，所以附連裝修嘅單位較難甩手。今個月中，本報介紹嘅東半山東山臺月陶居單位，連八十萬豪裝，竟然好快有買家承接。聽代理金豐鴻運董事關仲年講，原來個買家就係因為好鍾意間屋嘅裝修，睇咗兩次就扑槌。大家睇吓啲相，啲裝修係咪幾特別呢！
呢個買家原本住新界，諗住換市區樓方便返工，搵咗兩年都唔啱心水，睇到本報介紹，就即刻去睇樓，而且重睇得好仔細，因為要連埋裝修家具一齊買，搞咗兩日即成交。
呢個月陶居頂層單位，面積約一千二百呎，成交價五百萬；原業主計埋所有開支，賺九十二萬。聽講佢本來都係諗住自住，後來改變主意，以五百三十萬放盤，終以五百萬成交。
羅氏集團嘅尖沙嘴百樂酒店，地舖翻新後，陸續獲零售商戶租用，預期三月中入伙，現已租出約一半樓面，大部份租戶都係同自由行有關嘅行業。
美聯黃子華話，落實租用百樂酒店地舖嘅商戶，包括有豐澤電器、國美電器，重有係售賣年輕品牌手表店等。其中國美電器租用四間舖位，估計每月租金三十萬，而豐澤電器亦租咗三間舖位。至於傾緊嘅租商戶有雪糕店、時裝同化妝品連鎖店等。
百樂酒店地舖總面積近一萬四千呎，共有十七間舖，面積三百幾至二千幾呎，業主每呎叫租一百二十至一百九十蚊。項目一至四樓，改裝為年輕人商場，估計明年推出招租。
九龍站矚目新盤君臨天下，噚日截止登記，蘭西晏晝去咗金鐘廊示範單位參觀，諗住睇吓入票情況，結果有意外收穫，巧遇偶像歌手余文樂。佢下晝三點半現身君臨天下金鐘廊示範單位，佢戴住漁夫帽同太陽眼鏡，一直耐心聽身邊售樓處職員講解，不發一言，十分低調。
另外，原來近期活躍新盤市場嘅美容界名人鄭明明，之前都有打算買番個君臨天下單位自住，但係同發展商傾唔掂，佢重話已經聯絡過黃為山（即係恒隆市務部助理董事），不過都買唔到，要佢入票抽籤。但鄭明明又因為太忙唔得閒入票，所以噚日轉咗去買窩打老道8號。
九龍建業嘅九龍城前食為先酒家重建項目，早前喺內部搞咗個徵名比賽，結果噚日公布，命名栢德豪廷。
九建羅汝榮話，公司有五百幾個同事遞交樓盤名，可能係九建近年賣嘅樓盤，普遍都有個「釆」字，唔少同事起名時都有用個「釆」字，最後就爆冷選咗呢個名。
贏咗嘅同事，可獲得一千股九建股票作為獎勵。
唔講唔知，當日九建宣布話搞徵名比賽時，公司每股股價係五個七，噚日收報七蚊五仙，升咗一蚊三毫，得獎嘅員工，獎金亦都因股價升咗，賺多千幾蚊落袋。
工廈轉手獲利情況趨增，最近重出現一宗短期轉手。中原楊龍話，沙田小瀝源達利廣場七樓一個七六六呎單位，上個月以四十八萬成交，啱啱以五十六萬沽出，賺咗八萬蚊，不過，以幅度計算，就接近一成七，都算厲害。
楊龍指出，原業主本來買嚟收租，見有得賺就出貨。七百零蚊嘅呎價係市價，𠵱家嘅放盤叫價，已經升到八百至八百五十蚊。
原業主當日係用一次過付款買入單位，所以唔算炒賣；佢又透露，其實呢區近排好多租客買番租用嘅工廈單位，都係一次過畀晒錢。
蘭西
電郵地址：
