胡溫落柯打，鄔曾攝政，土共奪權，廢董退縮，唐曾挨批，董班子嘅權威，經已空洞化、模糊化、虛無化，搞到公務員唔知𠵱家呢個政府係邊個話事，定係究竟重有冇政府。
中環官場之中，連日好多耳語，大家都話要掌握祖國《瞭望》雜誌、本地《文匯》、《大公》兩報社論旨意，同埋學習鄔維庸嘅「狗餅論」講話，領會曾憲梓唱嘅《沒有共產黨就沒有新中國》嘅愛國唱K情懷，換言之，最新嘅領導權威，係「兩報一刊」為主導、「鄔曾」餵狗唱K為精神，全體公務員，乃至全港市民，都要深入領會「沒有共產黨就沒有新中國」嘅「雙沒有真理」，呢三大支柱，構成現時「兩報一刊鄔曾雙沒有」嘅「愛國治港大原則」。
不但係董班子，連三司十一局、十八萬公務員、立法會全體愛國愛港議政班子，以及全港大法官，都要團結在「兩報一刊鄔曾雙沒有」嘅愛國鬥爭總原則周圍，共同殲滅一小撮反華抗中踐踏23條嘅反革命敵人。
兩報一刊定下「愛國者具體四要求」，並點名司徒華、李柱銘、劉慧卿等人為立法會異己分子。愛國人士大為亢奮，大家都認為，中央出到聲，雖然理論上等到九月立法會先至再選，之不過，既然胡溫經已定性，咁廢董一日重窩藏佢哋喺立法會，一日就等於包庇縱容亂港嘅敵人，就算唔派警察入立法會將三人逮捕，都要即時做嘢，將三人逐出立法會。
廢董既然處處龜縮消極，咁就惟有由其他愛國嘅軍天勇將，發揮文革鬥爭嘅戰海豪情。幾乎可以鐵定為第三屆特首嘅梁振英，就代表胡溫中央，向劉慧卿呼喝叫陣。本來，卿姐叫梁振英有種就公開辯論，但阿振英哥學咗中央，要搞清楚何謂「原則」先，佢向卿姐提出「六大質問」，一定要卿姐先「交代」是否擁護台獨，至可以進入辯論與否嘅程序問題。
愛國親中派對振英哥嘅勇猛表現，十分讚賞。大家都話：本來呢一樣應該係由煲呔、唐唐以政府身份嚟迫劉慧卿表態嘅，但唐曾兩人鬥爭覺悟唔夠高，惟有由思想更紅嘅振英哥代下命令。
嘩，今時今日，特區政府是誰家天下？廢董身為特首，閃咗去邊？廢董爭取「連任」時，土共經已奪過一次權，今次係第二度政變，弱勢政府，任人噬咬，真係見者都戥佢覺得冇陰功？
傳真︰2623-9278
電郵︰