期指呢個場，愈玩愈大，到噚日為止，2月份未平倉合約重有6萬多張，呢個係記憶中結算前夕嘅高紀錄，估計重有好大數目等待今日現金結算，好淡勢撼得好激烈。
噚日淡友先贏一仗，全日力壓住幾隻大藍籌，包括中移動（941）同長實（001），結果恒指13600大關失守，收市跌156點，2月期指低水28點，3月期指更大低水107點，不過預計入滙控（005）同恒生（011）派息嘅因素，唔係咁得人驚。
滙控呢一輪好硬淨，噚日亦紋風不動，平收127元，下周一派成績表，市場預計盈利增幅由35%至40%不等。雖然業績唔錯，但由於股價已反映，相信刺激唔大。里昂就指出，滙控收購HouseholdInternational嘅資產質素可能勝過市場預期，估計滙控盈利87.2億美元，升40%，但維持「遜於大市」評級，目標價135元。
第一天然（1076）做披成，推介股票好易踩到「地雷」，不過，披成價0.64元，攞得過，攞唔到喺市場應有低吸機會，以03年度（12月年結）預測PE4倍多計，中長線實在揸得過，0.73元係阻力所在，升破就可以向1.0元水平推進。
彩星集團（635）繼續升，重搶到1.37元高收，再升8仙，已逼近1.4元阻力位，呢一隻轉捩股，已經係基金投資組合中一員，基金早輪將佢玩落，𠵱家玩番上，一升破1.4元，就確認進入新上升浪，唔見2字頭，基金唔會收手。
講開基金股，早輪做完披成嘅越秀投資（123），聽聞接咗貨嘅基金，已開始做工夫，噚日大市跌中就逆流而上，收0.93元，升1仙，成交4479萬股，增加2000萬股，今日再升，就可以擺脫10日、20日同50日平均線，重會升破下降軌，睇幾多？芬佬初步嘅目標係1.2元。
摩根大通一直有揸住越投，上月底再增持2.8億股，持股量上升到7.48%，增持價係0.95元。人民幣升值機會大，基金不斷增持中國資產，越投以注資的資產淨值全數入帳，每股資產淨值為1.74元，現價折讓46.5%，頗為吸引。
郭兆誠