恒指散156點，係月初以來最大跌幅，收13599，估計會下試13500齊頭大關口。市場始終錢多，會搵平嘢買，大市跌後仍會彈返上去。
大隻銀行股中，中銀（2388）跌幅較大，收15.15元，跌35仙，相信15元齊頭大關口可以守住，可以諗吓喺呢個位收集Call輪博反彈。短線做嘢，最佳對象係交投旺盛嘅9218，9月到期，輪價19.2仙，溢價4.3%，槓桿率7.9倍。唔想搏殺，則揀9115，5月到期，輪價4.05元，負溢價1.5%，槓桿率3.7倍，隻輪爆炸力同殺傷力都細啲。
石油股中，中海油（883）跌幅較大，收15.75元，唔見50仙，跌幅3.1%。呢隻大價油股，經常上吓落吓，落完又上，適宜搵相關Call輪炒波幅，對象係9032。隻輪昨收25仙，散15%，6月到期，溢價4%，槓桿率6.3倍。中海油有另一隻Call輪9421，8月到期，輪價18.8仙，溢價16.4%，槓桿率8.4倍，呢隻貴好多，除非正股升得好勁，否則幾乎肯定會跑輸畀9032。
中石油（857）收4.05元，微跌5仙，4元大關守得住，吼吓Call輪博一盅兩件，對象係9405與9445。前者6月夠鐘，輪價45.5仙，溢價6.3%，槓桿率8.9倍，後者7月到期，輪價36.5仙，溢價10.2%，槓桿率11.1倍。
章盛