一直野心勃勃想做特首嘅行政會議成員梁振英，向來謹言慎行避免被人記得佢係八萬五嘅黑手，但近日卻主動加入愛國論爭議，連番開口接受傳媒訪問，不讓黑面曾專美，政圈中人對梁振英動向議論紛紛，有人更忖度梁振英突然高調，可能係董建華下台嘅訊號。
其實舊年7.1大遊行後，政圈已流傳董建華只會留守至今年九月立法會選舉，新一屆立法會議員誕生之日，就係董建華下台之時，近日北京嚴打民主派，九月選舉結果大家心中有數，相信弱勢嘅董建華政府難以應付新局面，正是北京換馬好時機。
雖然傳聞不絕，但梁振英始終猶抱琵琶，另一方面對狙擊劉慧卿卻絕不手軟，他噚日再次發公開信，要求卿姐回覆有關是否支持台獨的六條問題，但冇回應係咪願意接下卿姐月底喺旺角街頭開壇辯論政改嘅戰書，真係冇膽。
傳真︰2623-9278
電郵︰