中大學生會與校長金耀基在二月十九日晚喺大學廣場舉行討論會，校方叫呢個會做「學系及課程整合交流會」，十分中性；學生就叫佢做「殺系論壇」，夠晒煽動性，𠵱家啲學生大概睇得報紙多，識得哄動性及宣傳性標題嘅效果，一聲「殺系」，零舍殺氣騰騰，鼓動人心。
老友L博士當晚冇去到現場，事後睇番中大內聯網，CUForum（NewsGroup）十分熱鬧，唔少學生大罵學生會，罵衝擊金校長嘅學生係「暴民」，非常刺激，自然亦有學生為學生會辯護，一來一往，互相纏鬥，睇嚟有排玩。
L博士讀書嘅時代，香港風調雨順，預算年年有盈餘，都唔知乜嘢叫做「筆直咳」，佢與一啲老鬼講起，知道中大代代都有學生請願之事，譬如吳明林就試過反對中期試；羅祥國當年與學生操上校長宿舍（李卓敏校長）門外靜坐；王維基（好似今日學生咁）飛身撲落地下，阻止馬臨校長座駕離開；高錕校長斯文怕羞，為咗粗俗不文嘅「小報」，俾學生糟質；李國章校長作風強悍，俾學生逼到與彭定康走後門避開；金校長以為太平無事喇啩，點知因為劉遵義要到暑假先可以上工，要做多半年，就碰上最麻煩嘅大學削資事件，搞到俾學生包圍，粗暴對待。睇怕凡係做中大校長嘅，都不能避此一劫。以此眼光睇，L博士話：「江山代有人才出，學生會領袖唔出位，就不似領袖。搞搞震嘅學生，多數係叻人，你睇王維基𠵱家幾醒。今年嗰位女會長，好似係會考8A尖子，讀會計系，三十年後，可能係會計師公會會長嚟㗎！」