Capcom剛推出嘅PS2遊戲《鬼武者3》，香港今次又係比日本快有得賣，而且中文原裝攻略亦已推出，加上特製記憶卡同刀形控制器，真係無論街頭街尾都見到金城武同尚連奴。Game本身行貨定價$438，不過好多Game舖連攻略特價套餐式賣，價錢上落頗大，不妨周圍格吓價。而除Game附送嘅特典DVD數量就比較少，想一套儲起就要快手。而《鬼武者3》提早推出亦影響到上星期其他Game反應麻麻，除咗《WINNINGELEVEN7INTERNATIONAL》斷貨之外，旺角市價曾炒到上6百都不乏捧場客，但係好似《G-GenerationGundamSeed》同《GallopRACER7》等都去貨麻麻，前者約$350，而後者就賣$330。至於上集好評嘅《ShadowHearts》，續集市價約$430，限定版就賣$750，而水貨Game《CoolGirl》市價約賣$450。
文：打機鐵人
PS2上嘅消防員的故事遊戲版《FIREFIGHTERF.D.18》，今次用新鮮感十足嘅消防員做題材，故事以美國縱火事件為主線，遊戲視點以第三身加《生化危機》形式進行，代理商龍勇亦會引入行貨，定價$458。