大市繼續在萬四關前爭持，噚日恒指一度上升125點，但又係倒跌收場，結果收13756，跌8點，3月期指繼續低水，但現貨月在尾市抽上去，收13812，高水56點。
大市在上周三創出13984的高位後，連同上周五微升1點嗰日，實際上已調整咗4日，恒指在13940同13691間上落，噚日大市本來有破位之勢，但高位明顯有大戶力壓，應該係同期指結算有關，大戶唔想個市咁快就衝關。喺萬四點樓下整固得愈耐，後市向上嘅力度亦愈大。
噚日推介嘅彩星集團（635），高見1.34元後回收1.29元，升5仙，已成功升破50日線（1.28元），且有近5600萬股的大成交支持（係去年11月中披成以來最大一日），動力強勁，中期升勢已可確認，短線有機會在50日線水平略作整固，如業績對辦，以及經營前景有得憧憬，則升破1.4元的重要阻力，重上1.6元，應該冇問題，中線更可見2字頭。
上周四推介的深圳國際（152），到噚日先發力，一衝破0.375嘅3頂阻力，立即急升，高收0.43元，大升17.8%，初步仍可以0.45元為目標。
第一天然（1076）係另一隻要留意嘅股票，去年9月開始，佢喺0.6元至0.73元間上落，足足有半年時間，噚日走勢出現突破，且成交配合，由前日的310萬股，大增5.2倍到1934萬股，只要衝破0.73元阻力，即可望空衝刺，短線目標0.95元，中線以上市兩年所形成的大型複式頭肩底來衡量，上升目標指向1.23元。
第一天然的業務是為急凍天然食品加工，包括海產和肉類，主要出口日本和美歐等地，有消息指公司新建的科研中心已落成，除擴大生產線外，並可用紫外線消毒包裝，提高產品的競爭力。
03年度（12月年結），估計獲利1.22億元，每股盈利0.153元，PE僅4.6倍。由於集團已取得歐盟「EEU」認證，食品可以進入歐洲市場，毛利率並可提升2%，預計04年度盈利可再取得2至3成增長，以PE6倍計，股價已可升上1元水平。
郭兆誠