香港奇樹多，大埔社山村「千年神木」奇在有6層樓咁高、馬鞍山大水坑「百子千孫樹」奇在似迷你森林，上水蕉徑村奇樹奇在樹中有樹，1棵大樟樹樹幹內竟另生1棵榕樹，兩者互相扶持健康成長，今日就帶大家現場直擊呢1棵「樹中樹」……唔係，係2棵樹至啱。
記者：陳震霖 攝影：楊錦文
模特兒：Esther（SunSpot）
蓮塘尾落車，過對面馬路入蕉徑村，先見到「蕉徑蔬菜產銷貸款有限責任合作社」，嗚！個名水蛇春咁長，究竟合作啲乜東東？話說以前蕉徑村村民只會個別攞農作物出上水墟街市擺賣，但近年入口蔬菜愈來愈多，市民對本地農作物需求減少。村民為求生計，合作社應運而生，先將蔬菜收集，去蕪存菁，然後一次過分銷批發，蔬菜質素好，自然叫得好價錢。
開得合作社，蔬菜質素當然一流，村內唔少菜田都戙起個鐵牌，白底綠字，以為寫住「私人菜田，禁止闖入」之類字眼，睇真，原來寫住「漁農署認可信譽農場」，即係農場Q嘜標記咁解，Q嘜標記得來不易，只有採納認可生產程序嘅蔬菜農場，漁農署先會頒呢個榮譽，認真唔講得笑。
聽老村民講，以前蕉徑村好繁盛，農業係主要收入來源，時移世易，年輕一輩多數外遷，農地無人耕種，慢慢荒廢，有啲甚至改建成賽車場㖭。
蕉徑村勁多分叉村路，路在口邊，要搵「樹中樹」，先向友善村民問路，向西行15分鐘，見老早因收生不足而關閉嘅蕉徑公立學校。Esther八卦，左昅右昅，發覺裏面七國咁亂，粉筆粉擦枱枱櫈櫈一地都係，校外空地重變埋小型停車場㖭。過埋學校，見彭氏祠堂，離「樹中樹」已經不遠。
繼續西行入村，應該愈來愈偏僻寧靜，點知反而聽到勁嘈賽車引擎聲，再行，眼前忽然有架電單車飛過，原來所在係「香港越野電單車運動總會」練習場，會長有20年玩車經驗，最鍾意教人鍊車。
唔使攞牌一樣玩得，初學者要先上1個基本訓練課程，然後再落場同其他人比賽。星期六日最多人喺度一較高下，唔少車手重係外國人㖭，睇佢哋風馳電掣，一時直路比拼，一時沙地自轉，一時飛越小沙丘，塵土飛揚，玩盡唔同花式，Esther都忍唔住一顯身手。
香港越野電單車運動總會（26598159）
地址：新界上水唐公嶺
網址：
會費：每日$50，每年$600；訓練班每2小時$350；租車費（包護身服及機油）每小時$300，每2小時$400。
鍊完車，最後目的地龍潭古廟，古廟已有超過300年歷史，主要供奉觀世音菩薩，由蕉徑六村村民合力興建，廟祝話寺廟原本破爛不堪，直到1966年先重新逐年修葺，先有𠵱家個靚樣。廟後有山路直上雞公嶺，初段係條迷你竹林隧道，環境尚算清幽。
「樹中樹」遠睇就無咩特別，近睇，發覺有棵大樹樹心穿咗個大窿，窿裏面竟然重有另一棵大樹，憑強烈嘅刺鼻樹味，外面嗰棵肯定係樟樹，裏面嗰棵呢？村民就話係榕樹，確實品種無從稽考，2棵樹連體生長，和諧共處，但依然茁壯。樹下有一石平台，不妨一邊賞奇樹邊唞涼，小休過後再繼續旅程。
蕉徑村附近嘅蓮塘尾村有個露天茶座，行山路探奇樹鍊完車，斷估你都會肚打鼓，不妨整碗熱辣辣公仔麵（$14），再加杯冰凍檸茶（$12），唞夠先出番市區。
榮昌茶座（26703388）
地址：上水粉錦公路蓮塘尾1號
交通
去程：上水火車站乘57K（$4），粉錦公路蓮塘尾下車，前行5分鐘入蕉徑村。
回程：蕉徑村出粉錦公路，乘57K回上水火車站。
