威高（1173）上周五股價急升，經紀陳講過可能係芬佬增持。噚日睇聯交所資料，終於揭開謎底，原來真係金手指增持1140萬股，令持股量由6.97%增加至7.66%。由於金手指睇起，估計隻股繼續有運行。
據講，金手指去年由0.13元水平開始收集威高，上周買貨平均價已經去到0.211元，睇嚟真係對隻股好有信心。威高噚日冇升跌，收0.235元，成交股數2170萬股，金額512萬元。經紀陳話，可以等股價稍回，然後再上車都未遲。
其實除咗威高外，金手指喺上個星期，亦買入一隻創業板股，就係近年一直在娛樂版佔有大量篇幅的修身堂（8200）。經紀陳話，修身堂早前出業績，傳聞有人想藉業績靚仔，順勢炒番轉，估唔到今次搞手咁堅，搵到金手指入局，而且重買成7%咁多。
經紀陳又話，今次金手指罕有地買入創業板股份，江湖傳聞修身堂在得到金手指入股後，原來的炒家已經全部離場，稍後表現將耳目一新。
慕容小初