恒指變化不大，銀行股硬淨，地產股冇力，公用股巴閉。兩電一煤，升幅由45仙至90仙。中煤（003）升幅3.5%，中電（002）2.3%，港燈（006）1.8%。啲升幅百分率好似唔多起眼，但啲相關Call輪因為有槓桿效應，升幅大好多。
中煤Call輪9248收1.33元，大漲32%，5月到期，負溢價1.8%，槓桿率10.1倍。睇數據，好抵買，但要留意隻輪到期前正股有一次股息收，所以實際唔係負溢價。另外，中煤通常波幅唔大，近期累積升幅唔細，可能會先有整固。隻股唔再去，隻輪冇運行。
港燈Call輪9617收26.5仙，升16%，6月到期，負溢價2%，槓桿率12.6倍。隻輪同中煤輪一樣，喺隻輪到期前正股會先收一次股息，致有負溢價情況。即使實際略有溢價，都仍然諗得過，因為正股PE冇離譜，正股股價過去年幾跑輸大市好多，博跟番大市，帶起埋隻輪。
中電升90仙，唯一Call輪9302升得2仙，只係反映得正股升20仙。隻輪係昨日大升公用Call輪中最長壽嘅，年底到期，溢價1.1%，槓桿率10.7倍。博隻輪跟番正股走，有番合比例嘅升幅，諗得過。正股成5厘息，隻輪計埋股息因素，實際溢價超過6%，但壽命長，所以仍然唔貴。
章盛