鄧梓峰早前被指搭上郭羨妮，昨日以新髮型示人的郭羨妮與鄧梓峰在劇集《天涯俠醫》拜神儀式上碰面，二人表現異常尷尬，在再三要求下才肯勉強合照。
無綫劇集《天涯俠醫》昨日在將軍澳電視廣播城進行開鏡拜神儀式，劇中有份參與演出的演員包括張家輝、郭羨妮、林峰、唐寧、連凱、鄧梓峰等。
早前有報道指有婦之夫鄧梓峰搭上和溫兆倫拍拖的郭羨妮，昨日二人首度碰面時，雖有點頭打招呼，但當記者要求合照時，鄧梓峰卻藉詞婉拒，郭羨妮則表示要問過經理人。
經過一輪擾攘之後，二人始肯大方合照，鄧梓峰解釋說：「我唔係怕尷尬唔想影，係唔知人哋點，佢又拍緊拖，唔知佢會唔會介意嘛！其實都係同以往一樣，見面嗰陣咪打個招呼，以後更加唔會覺得特別尷尬。」
郭羨妮就表示為了該劇，將留了十年的長髮剪掉，但卻未感可惜，她說：「反而係周圍嘅人驚我唔慣，不過把頭髮唔經唔覺都留咗十年，我入行嗰時已經係長頭髮，𠵱家感覺幾好，好清爽，幾方便。」不過，其男友溫兆倫知道她要剪短頭髮後，卻大為緊張，郭羨妮說：「我喺決定剪之後先話畀佢知，佢𠵱家重未見過，我都驚佢嚇死，佢重叫我唔好剪咁短，剪完之後，重好緊張咁問靚唔靚，咁我梗係話靚啦！」
此外，該劇早前構思找一個有份量女星，在劇中客串飾演張家輝已去世的女友，張家輝說：「我都係噚日先知搵到梁詠琪拍。」張家輝續說：「我得五呎七，不過我諗導演都會提佢唔好着高跟鞋！」
採訪：楊潔雯
攝影：仇志中
