古天樂、李彩樺（Rain）同周汶錡噚日喺九龍塘拍攝電影《戀情告急》嘅預告片，阿Rain同周汶錡都係飾演古仔嘅前度女友，所以古仔同阿Rain嘅造型都好鬼「薯嘜」，古仔重戴住個黑框眼鏡襯佢個八二分界嘅髮型，實行扮晒懷舊咁㖭。
而周汶錡就處女下海，第一次拍戲，不過佢表現都唔差，但係佢就唔係好想咁快俾人知佢拍戲，佢話：「咁快俾人知就冇咗新鮮感，我重會感到有壓力。」佢話連男友杜德偉都唔知佢接咗呢部戲。
古仔噚日要拍一場追巴士嘅戲，點知呢一場戲就考起古仔喇，原來佢細個從來冇追過巴士，古仔話：「我細個返學都係阿爸阿媽揸車接我，都唔會搭巴士，讀到中四都係由佢哋接。」佢重話佢讀書嘅年代都不知幾咁單純。
朱茵日前喺上海為《性感都市》做宣傳，提到導演王晶話香港女仔外表豪放，內在保守，問朱茵同唔同意，佢就話唔應該用豪放，應該係開放，其實幾乎所有香港人都係咁。朱茵又講到中學時好想做作家，但寫書對目前嘅佢嚟講都幾有難度，不過佢都會填吓詞咁，畀人感覺有內涵一啲喎。
身為「饑饉之星」嘅何韻詩同方力申，前日正式出發遠赴東帝汶首都帝力，展開為期五日嘅生活體驗。因為呢個係《饑饉三十》嘅頭炮，所以阿詩嘅心情特別振奮，喺出發前一日重特別準備咗大量糖果，預備派畀當地嘅小朋友。而呢個行程適逢係方力申嘅生日，阿詩笑言會冷漠對待，務求令佢感受到自己平日有幾幸福喎！
雷宇揚前晚喺尖沙嘴睇電影《男上女下》首映，佢即將開拍新片《失戀俱樂部》，呢套戲會搵李克勤、杜汶澤同陳小春演出，雷宇揚話：「我覺得克勤係一名好優質演員，唱歌好，演戲都唔差。」雷宇揚重話上星期推出嘅新書，搵咗倪震寫序，希望可以增加銷路咁話。又出書又開戲，睇嚟佢都可以升級做才子啦啩！
林嘉欣噚日以一身學生裝去商台接受直播訪問，提到最難忘嘅戀愛回憶時，嘉欣最難忘喺台灣嘅舊情人，佢話：「之前個台灣男友係我主動追求佢嘅，記得第一次約會時我重皮膚敏感，出到嚟惟有用本書遮住塊面，個肚鬼咁餓又唔敢食嘢，諗番都覺好戇居，不過佢已經結咗婚，我哋仍然係朋友，但好少聯絡。」
