03年嘅DVD機戰場係5.1套裝機，踏入04年，主戰場已經無聲無息轉移至DVD錄影機之上；眼利者只要見到大部份國產牌子近排猛出機，而且價錢不斷下調，就知又係入貨時候！最近SYKWORTH及ROWA差不多同期推出DVD+R/RW錄影機，吸引處是機價都唔過$3,000，比起同類機索價四、五千蚊，的確抵玩得多，加上燒錄出嚟嘅DVD影碟對應普通DVD機，真係要大嗌一聲國產機萬歲！
記者：朱崇德 攝影：陳偉強 ImageGirl：Va（Sunspot）
喺未介紹DVD錄影機之前，先同大家講吓歷史；現時DVD錄影機制式，是一個三分天下局面，第一部推出市場的民用DVD錄影機是PioneerDVR-1000（1999年12月），所行制式是DVD-R/RW，當年首批機到港的售價，是貼近2萬元的天價，加上燒出嚟的DVD碟亦只可喺原機度睇番，所以成為了唔太普及嘅貴族音響；2000年9月，Panasonic推出了DVD-RAM的新制式（DMR-E10），並以可重複燒錄10,000次的優越性功能，贏得AV玩家愛戴（DVD-RW可燒錄約1,000次），可惜唯一弊端，是燒錄光碟只可在DVD-RAM及Panasonic推出的DVD-ROM播放，所以亦出現了兼容性的問題！
而第三勢力PHILIPS倡導的DVD+R/RW制式，可以話係最遲推出的一種制式，首部問世之DVR1000，要在2001年9月才推出市場，不過論兼容性就真係超強！基本由DVD+R/RW燒錄出來的光碟，放入一般DVD機、DVD-R/RW及電腦DVD-ROM，都可完全播放，可能國產DVD生產商就是看準這點，所以他們大部份都投入了這個「+」的陣營，而今日介紹的兩部DVD錄影機，亦使用了「+」制式。其中SKYWORTHDVDR-001是最新推出的國產DVD+R/RW錄影機，誘人之處是機價勁筍！做到$2,798的低價，估計呢個價錢將會成「+」機今年內的「摸底價」！
「平」雖然係重要賣點，不過講到燒DVD影碟質素都相當重要，需知DVDR-001的光碟盤以及重要ChipSet部件，基本完全使用了PHILIPS的技術及零件，話佢係國產機，不過骨子裏是「黃皮白心」！相對現時一般歐洲及日本出產的DVD錄影機要成$4,000至$5,000價位，真係差唔多質素，但又平咗一半價錢！
筆者測試時覺得最感動之處，雖然DVD錄影機係新科技產物，但操作上簡單得有如普通錄影機，機身內置TVTuner，只要在Menu內作自動Set台，簡單一按「Record」就馬上錄下電視節目！而且機身還內置有IEEE1394、S-Video及音視頻插口（俗稱AV線），所以用DV機拍下的生活片段，以至DVD機、VHS舊錄影帶、家用遊戲機的影像，都可以作DVD的影碟燒錄！
好多人有一個錯覺，以為DVD錄影機是一種富貴人家的玩意，其實絕對不然！筆者曾以雜廠出品DVD-R碟片（$8）對DVDR-001作測試，發現連燒10張碟片，都從未有燒死碟的情況出現！而且佢同VHS錄影機相若，一樣有勁慳家嘅6段式延長錄影功能，1張4.7GB容量的DVD-R，在最高質的HQ模式下可以收錄1小時影音片段，SP模式（DVD質素）是2小時、LP模式（S-VHS質素）是3小時、EP模式（稍高於VHS質素）是4小時、EP+模式（VHS質素）則為6小時！如果再用上可以重複燒錄1,000次的DVD-RW光碟，真係隨時平過你玩VHS錄影機！
由於最高可以錄成6個鐘DVD影像，當然要方便用家為主，分段分Index啦！基本燒錄段數並沒有太大限制，用家除可一次過錄足6小時外，如果在錄影中途按Stop，就會自成一個影像段落，同一般DVD燒錄機一樣，大家一日唔作Finalizing，就可以一直錄到隻碟爆滿為止！而且DVDR-001還會自製有圖示Menu，兼且用家可以自行編輯章節名稱，真係非常有系統！
至於燒錄出來的DVD-R/RW兼容問題，筆者就曾以DVDR-001燒出來的DVD-R，放在DVD-R陣營的LG普通DVD機，及國產DVD機作播放，發現在兼容閱讀性上並冇問題！至於電腦DVD-ROM方面，筆者使用了舊款的Pioneer電腦DVD-ROM作測試，亦發現沒有兼容的問題！
查詢電話：26493833
DVD+R/RW錄影機雙生兒
講到國產DVD+R/RW錄影機，又點可以唔提剛出咗一個月，近期AV場內大熱賣的ROWADVDR311！IEEE1394、AV插口、S-Video插口、1-6小時選擇錄影時間、燒錄DVD-R/RW碟片兼容性……，全部配置都同SKYWORTHDVDR-001一模一樣，打開機籠一看，不得了！除咗電容及火牛組件之外，基本DVD燒錄組件部份，同DVDR-001差唔多有90%一模一樣！難怪DVDR311連機內Menu都差唔多一樣，話佢哋係同父異母親兄弟都不為過！
至於在使用上，DVDR311亦有過人之處！最方便係一插機，校時間、電視機追台全部自己跳晒出嚟，唔使大家睇說明書又摷機內Menu咁麻煩，而且按鍵反應上，亦較DVDR-001感覺迅速，如果是AV影音產品新手，俾多$200，使用上可以方便好多！
