特首董建華噚日出席一個頒獎禮，由十三間以親中傳媒為主嘅機構，搞咗個○三年特區政府施政十件大事評選。阿董對住傳媒依然冇乜兩句，離開時好多記者問佢「兩鐵合併係咪一件好事」，阿董嘅回應只係擺擺手，就咁走咗去。唔通阿董想話合併唔係好事？
而個頒獎禮就真係樣樣都係「好事」，連最矚目嘅7.1五十萬人大遊行，竟然都榜上無名。23條排第二位，字眼重係「擱置23條立法集中振興經濟」，唔知情嘅外人睇咗，分分鐘會以為係政府順應民意，主動擱置立法。
排第一位者係「政府與市民同心合力戰勝沙士」，第三位開始順序係楊利偉應特區政府邀請訪港、兩位問責官員相繼辭職、成功爭取個人遊、政府與大學對話商削教育經費、落實二十小時通關、賭波規範化截黑社會財源、簽署CEPA、區選提高公民意識。
傳真︰2623-9278
電郵︰